Քաղաքագետ Սուրեն Սուրենյանցի դիտարկմամբ` երկու բաղադրիչ հիմք ծառայեցին, որպեսզի հիմա տեղի ունենային հիշյալ զարգացումները։ Առաջինն այն է, որ իշխանությունն, ըստ էության, ձախողել է հակահամաճարակային քաղաքականությունը, ուստի կա հասարակության ուշադրությունը շեղելու խնդիր։
Իսկ երկրորդ բաղադրիչն այն է, որ Փաշինյանի թիմը, չնայած երկու տարուց ավելի իշխանության է, բայց միշտ փորձել է ռազմավարական ծրագրեր ներկայացնելու փոխարեն իր իշխանությունը պահել այլ տեսարաններ ապահովելու միջոցով։
«Եթե այդ հնարքն արդյունավետորեն աշխատում էր անցյալ, նախանցյալ տարի, ապա խիստ կասկածում եմ, որ նույն հնարքը կարող է հիմա էլ գործել, որովհետև հասարակության մեջ իշխանության թիմն ակնհայտորեն չունի այն վարկանիշը, որ ուներ վեց ամիս կամ մեկ տարի առաջ։ Եվ վերջապես կանխատեսելի էր, որ կթիրախավորվի պարոն Ծառուկյանը հունիսի 5-ին ունեցած ելույթից հետո, քանի որ ցավոք սրտի նույնիսկ հեղափոխությունից հետո Հայաստանում քաղաքական մշակույթը չի փոխվել, և իշխանությունը նույնքան անհանդուրժող է այլակարծության, քննադատության հանդեպ»,– նշում է քաղաքագետը։
Սուրենյանցի գնահատմամբ` ընտրովի արդարադատության միջոցով որևէ երկրում դեռ օրինականություն չի հաստատվել, և երեկ դատախազի միջնորդությունը խորհրդարանում լավագույնս ապացուցեց, որ այս դեպքում ևս գործ ունենք ընտրովի արդարադատության հետ, այսինքն` ընտրվել է «մեղադրյալ» և որոշվել, թե ինչ գործ «կարեն» նրա վրա։
«Այս ամենը կհանգեցնի քաղաքական բևեռացման, ավելի կոշտ քաղաքական հռետորաբանության, որովհետև եթե Ռոբերտ Քոչարյանի կամ Սերժ Սարգսյանի պարագայում իշխանությանը շատ ավելի հարմար էր նրանց կերպարների դեմ կոնսոլիդացնել հասարակությանը, ապա այս դեպքում այդ հնարքն ամբողջովին աշխատել չի կարող, որովհետև ԲՀԿ–ն ու նրա ղեկավարը նույնիսկ հեղափոխությունից հետո անցկացված ընտրությունների արդյունքներով ունեն համակիրների բավականին մեծ զանգված»,– նշում է քաղաքագետը։
Սուրեն Սուրենյանցի համոզմամբ` հասարակությունը միանշանակ միատեսակ ընկալում կամ գնահատական չունի այն զարգացումների վերաբերյալ, որոնք տեղի են ունենում երկրում։ Իշխանությունն էլ, ընդդիմությունն էլ ունեն հետևորդներ, և սա այն դեպքը չէ, որ ականատես լինենք հասարակության միարժեք արձագանքին կամ կոնսոլիդացիային, հետևաբար վերջին իրադարձություններից հետո քաղաքական զարգացումները դառնում են անկանխատեսելի։
Հիշեցնենք, որ հունիսի 16–ին ԱԺ–ն որոշեց զրկել Ծառուկյանին անձեռնմխելիությունից և թույլատրել նրա նկատմամբ քրեական հետապնդում սկսել։
ԱԱԾ-ն հունիսի 14-ի վաղ առավոտից խուզարկություն էր իրականացրել ԲՀԿ առաջնորդ, պատգամավոր Գագիկ Ծառուկյանի Առինջի առանձնատանը:
Նրա դեմ 3 քրեական գործ է հարուցվել։ Առաջին քրեական գործը վերաբերում է «Շանգրի Լա» և «Օնիրա Քլաբ» խաղատներին, որի համաձայն` դրանց ապօրինի ձեռնարկատիրական գործունեության հետևանքով պետությանը հասցվել է շուրջ 30 մլրդ դրամի վնաս: Երկրորդ քրգործը վերաբերում է 2017թ-ի խորհրդարանական ընտրություններին: Ըստ գործի նյութերի` ԲՀԿ-ն հարյուր հազարների ընտրակաշառք է բաժանել:
Իսկ երրորդ քրեական գործը վերաբերում է Կոտայքի Առինջ համայնքում Ծառուկյանին պատկանող «Նյու» ընկերությանն օտարված հողատարածքին: Առինջի գյուղապետի ու ավագանու անդամների անօրինական որոշումների արդյունքում, ըստ գործի, համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
Երեկ ԱԱԾ-ն հանդես եկավ նաև չորրորդ քրեական գործի մասին հայտարարությամբ, որը վերաբերում է արդեն 2017թ-ի Երևանի ավագանու ընտրություններում ԲՀԿ-ի կատարած ընտրախախտումներին:
