ԵՐԵՎԱՆ, 17 հունիսի - Sputnik. Այսօր «Բարգավաճ Հայաստանը» բոյկոտեց Ազգային ժողովի նիստը․ պատգամավորները լքեցին դահլիճը։ ԲՀԿ-ական Արման Աբովյանը հայտնեց, որ ցավում է` իշխանությունը փորձում է լռեցնել քաղաքական ընդդիմախոսներին։ Նրա խոսքով` սա ճանապարհ չէ, այսինքն` Հայաստանը դեպի վերջնական փակուղի տանող ճանապարհ է։
«Մեկ բան եմ ուզում ասել խորհրդարանական մեծամասնությանը` վստահաբար դեմ եք եղել ձեզ պարտադրված այս անօրինական քվեարկությանը։ Հիշեք` Հայաստանը բռնապետություն դառնալու ռեսուրս չունի»,–ասաց Աբովյանը։
ԱԱԾ–ի մոտ Գագիկ Ծառուկյանի համակիրների հավաք անցկացնելու դեպքի առթիվ քրգործ է հարուցվել
Նա նշեց նաև, որ երեկ` ԲՀԿ ղեկավար Գագիկ Ծառուկյանին անձեռնմխելիությունից զրկելը ոչ այլ ինչ է, քան քաղաքական հաշվեհարդար` իշխանության կարծիքի հետ անհամաձայնություն հայտնած քաղաքական ուժի և նրա ղեկավարի հետ։ Աբովյանը ընդգծեց, որ հաշվի առնելով երեկ տեղի ունեցած «քաղաքական բեսպրիդելը»` ԲՀԿ–ն բոյկոտում է նիստն ու լքում դահլիճը։
Դրանից հետո ԲՀԿ–ական բոլոր պատգամավորները դուրս եկան ԱԺ նիստերի դահլիճից։
Հիշեցնենք, որ ԱԺ–ն երեկ որոշեց Ծառուկյանին անձեռնմխելիությունից զրկել ու թույլատրել նրա նկատմամբ քրեական հետապնդում իրականացնել։
Ով իր շահի մասին է մտածում, նա դավաճան է. Ծառուկյանը դուրս եկավ ԱԱԾ–ի շենքից
ՀՀ ԱԱԾ-ն հունիսի 14-ի վաղ առավոտից խուզարկություն էր իրականացրել ԲՀԿ առաջնորդ, պատգամավոր Գագիկ Ծառուկյանի Առինջի առանձնատանը:
Դեռ հունիսի 14-ին Ծառուկյանի հարցաքննության ընթացքում ԱԱԾ-ն հանդես եկավ մի քանի պաշտոնական հայտարարություններով, որտեղ ներկայացրեց Ծառուկյանի նկատմամբ կատարված քննչական գործողությունների իրավական հիմքերն ու հարուցված 3 քրեական գործեր:
Առաջին քրեական գործը վերաբերում է «Շանգրի Լա» և «Օնիրա Քլաբ» խաղատներին, որի համաձայն` դրանց ապօրինի ձեռնարկատիրական գործունեության հետևանքով պետությանը հասցվել է շուրջ 30 մլրդ դրամի վնաս: Երկրորդ քրգործը վերաբերում է 2017թ-ի խորհրդարանական ընտրություններին:
Թեժ օր Ծառուկյանի համար. օրվա խրոնիկան` լուսանկարներով
Ըստ գործի նյութերի` ԲՀԿ-ն հարյուր հազարների ընտրակաշառք է բաժանել: Իսկ երրորդ քրեական գործը վերաբերում է Կոտայքի Առինջ համայնքում Ծառուկյանին պատկանող «Նյու» ընկերությանն օտարված հողատարածքին: Առինջի գյուղապետի ու ավագանու անդամների անօրինական որոշումների արդյունքում, ըստ գործի, համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
Երեկ ԱԱԾ-ն հանդես եկավ նաև չորրորդ քրեական գործի մասին հայտարարությամբ, որը վերաբերում է արդեն 2017թ-ի Երևանի ավագանու ընտրություններում ԲՀԿ-ի կատարած ընտրախախտումներին:
