ԵՐԵՎԱՆ, 16 հունիսի – Sputnik. ՀՀ քննչական կոմիտեն տեղեկացնում է, որ Ազգային անվտանգության ծառայության տարածքում ԲՀԿ ղեկավար Գագիկ Ծառուկյանի համակիրների հավաքներ կազմակերպելու և անցկացնելու դեպքի առթիվ հարուցվել է քրեական գործ։
Քրգործ է հարուցվել, քանի որ հունիսի 14-ին հավաքի մասնակիցները ոչ միայն խախտել են արտակարգ դրության ժամանակ հավաքներ չանցկացնելու մասին դրույթը, այլ նաև փակել են Երևանի Նալբանդյան և Խանջյան փողոցները, խաթարել երթևեկությունը։
Նշվում է, որ հավաքի մասնակիցները չեն ենթասրկվել նաև ոստիկանության օրինական պահանջներին։
Քրգործը հարուցվել է ՀՀ քրեական օրենսգրքի 225.1-րդ հոդվածի 1-ին մասի հատկանիշներով` օրենքով սահմանված կարգի խախտմամբ հավաք կազմակերպելը և անցկացնելու համար։
ՔԿ–ն հորդորում է արտակարգ դրության պայմաններում զերծ մնալ հավաքներ կազմակերպելուց և դրանց մասնակցելուց՝ պահպանելով օրենքով և ՀՀ կառավարության որոշմամբ սահմանված սահմանափակումները։ Կոմիտեն հիշեցնում է, որ այդ պահանջները խախտողները քրեական պատասխանատվության կարող են ենթարկվել։
Հիշեցնենք՝ ՀՀ ԱԱԾ-ն հունիսի 14-ի վաղ առավոտից խուզարկություն էր իրականացրել ԲՀԿ առաջնորդ, պատգամավոր Գագիկ Ծառուկյանի Առինջի առանձնատանը: Ավելի ուշ Ծառուկյանին հրավիրել էին ԱԱԾ՝ հարցաքննության: Հենց այդ պատճառով էլ նրա համակիրները հավաքվել էին ԱԱԾ–ի մոտ։
Նշենք, որ ԱԺ–ն այսօր որոշեց Ծառուկյանին անձեռնմխելիությունից զրկել ու թույլատրել նրա նկատմամբ քրեական հետապնդում իրականացնել։ Այս պահին էլ ԱԱԾ–ի մոտ հավաքված են Ծառուկյանի համակիրները, ինչպես նաև ԲՀԿ–ական պատգամավորներ։
Դեռ հունիսի 14-ին Ծառուկյանի հարցաքննության ընթացքում ԱԱԾ-ն հանդես եկավ մի քանի պաշտոնական հայտարարություններով, որտեղ ներկայացրեց Ծառուկյանի նկատմամբ կատարված քննչական գործողությունների իրավական հիմքերն ու հարուցված 3 քրեական գործեր:
ԲՀԿ–ական պատգամավորները և Ծառուկյանի համակիրներն ԱԱԾ–ի մոտ են. տեսանյութ
Առաջին քրեական գործը վերաբերում է «Շանգրի Լա» և «Օնիրա Քլաբ» խաղատներին, որի համաձայն` դրանց ապօրինի ձեռնարկատիրական գործունեության հետևանքով պետությանը հասցվել է շուրջ 30 մլրդ դրամի վնաս: Երկրորդ քրգործը վերաբերում է 2017թ-ի խորհրդարանական ընտրություններին:
Բերման ենթարկվածների թիվն ավելացել է. Ծառուկյանի աջակիցներից 154–ը ոստիկանությունում են
Ըստ գործի նյութերի` ԲՀԿ-ն հարյուր հազարների ընտրակաշառք է բաժանել: Իսկ երրորդ քրեական գործը վերաբերում է Կոտայքի Առինջ համայնքում Ծառուկյանին պատկանող «Նյու» ընկերությանն օտարված հողատարածքին: Առինջի գյուղապետի ու ավագանու անդամների անօրինական որոշումների արդյունքում, ըստ գործի, համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
Այսօր ԱԱԾ-ն հանդես եկավ նաև չորրոդ քրեական գործի մասին հայտարարությամբ, որը վերաբերում է արդեն 2017թ-ի Երևանի ավագանու ընտրություններում ԲՀԿ-ի կատարած ընտրախախտումներին:
