ԵՐԵՎԱՆ, 13 հունիսի — Sputnik. Այսուհետև բոլոր փողոցներում ու բակերում կհնչի բացառապես ՀՀ վարչապետ Նիկոլ Փաշինյանի ձայնը, և հենց նա մարդկանց կհորդորի պահպանել հակահամաճարակային կանոնները: Տեղեկությունը Sputnik Արմենիային հայտնեց ՀՀ վարչապետի խոսնակ Մանե Գևորգյանը:
Նշենք, որ այսօր առավոտից Երևանի փողոցներում արդեն իսկ հնչում է Փաշինյանի հորդորը` պետք է դիմակ դնել, ախտահանել ձեռքերն ու պահպանել սոցիալական հեռավորություն:
Հիշեցնենք` երեկ Փաշինյանը Facebook–ում խնդրել էր բոլորին հանդես գալ հակահամաճարակային կանոնների պահպանման մասին հայտարարությամբ և այն հրապարակել սոցիալական ցանցերում:
Նա ներկայացրել էր նաև հայտարարության տեքստը. «Ուշադրություն, խոսում է ՀՀ քաղաքացի (անուն, ազգանուն)։ Սիրելի հայրենակիցներ, Հայաստանի Հանրապետությունում կորոնավիրուսի համաճարակ է: Բոլորիդ կոչ եմ անում կրել դիմակներ և դրանք հանել միայն սնվելիս: Դիմակը պետք է կրել այնպես, որ այն փակի ձեր քիթը և բերանը: Պարբերաբար ախտահանեք ձեր ձեռքերը և չախտահանված ձեռքերով մի դիպեք ձեր դեմքին: Պահպանեք մեկուկես մետր սոցիալական հեռավորություն և բացառեք առանց դիմակի շփումը ձեր ընտանիքի անդամ չհանդիսացող անձանց հետ: Սիրելի հայրենակիցներ, կրեք դիմակներ և դրանով կփրկեք հարյուրավոր կյանքեր: Դիմակները անհրաժեշտ է փոխել երեք-չորս ժամը մեկ: Կարող եք օգտագործել ոչ միայն գործարանային արտադրության, այլև ձեր կողմից պատրաստած դիմակներ»։
Հավելենք` Հայաստանում կորոնավիրուսով վարակվածների թիվը վերջին մեկ օրում ավելացել է 723-ով և հասել 16003–ի։ Ընդհանուր առմամբ առողջացել է 6081 մարդ (+442), մահացել են 264-ը։
Հիշեցնենք նաև, որ մարտի 16–ից Հայաստանում արտակարգ դրության ռեժիմ է գործում։ ՀՀ կառավարությունը մայիսի 14–ի նիստում որոշեց կորոնավիրուսի կանխարգելման նպատակով հայտարարված արտակարգ դրությունը երկարացնել ևս մեկ ամսով։ Երկարաձգված արտակարգ դրության պայմանները որոշակի փոփոխությունների ենթարկվեցին։ Տնտեսական շատ գործունեություններ թույլատրվեցին, բայց սահմանվեցին պարտադիր պահանջներ։
Մայիսի 18–ից Հայաստանում սկսեց աշխատել նաև հասարակական տրանսպորտը, բայց ուղևորներն ու վարորդները պետք է անպայման պաշտպանիչ դիմակով ու ձեռնոցով լինեն։ Արտակարգ դրության ընթացքում կիրառվող կարգավորումներում փոփոխություններ և լրացումներ ուժի մեջ մտան հունիսի 4-ին։
Այսուհետ բոլոր հանրային բաց տարածքներում դիմակ դնելը պարտադիր է։ Հանրային բաց վայրերում դիմակ կարող են չդնել միայն մինչև 6 տարեկան երեխաները, հեծանիվ վարողներն ու ֆիզիկական վարժություններ անողները։
ՀՀ կառավարությունը հունիսի 12-ի արտահերթ նիստում որոշեց արտակարգ դրության ժամկետը երկարաձգել մինչև հուլիսի 13-ը։
