ԵՐԵՎԱՆ, 13 հունիսի – Sputnik. Shamshyan.com-ն ահազանգ է ստացել Երևան քաղաքի Ազատության 25 հասցեում գործող «Մանանա» գեղեցկության սրահի դիմահարդար Էվելինա Հակոբյանից։ Նա հայտնել է, որ տնօրենն առանց Հակոբյանին տեղյակ պահելու, հետևաբար նաև առանց հաճախորդների իմացության տեսախցիկ է տեղադրել դիմահարդարի աշխատասենյակում, որտեղ իրականացվել է նաև էլոս էպիլացիա:
«12 տարի աշխատել եմ այդտեղ, աշխատում էի դիմահարդար, իմ սենյակում կատարում էի նաև դեմքի և ամբողջ մարմնի մազահեռացում: Մինչև կորոնավիրուսը մեր սենյակում տեսախցիկ չի եղել, չի էլ թույլատրվում դնել, քանի որ մարդիկ այդտեղ մերկանում են: Եթե անգամ դրվեր էլ, պետք է զգուշացվեր այդ մասին թե՛ ինձ և թե՛ հաճախորդներին: Տնօրենը պատը թաքուն ծակել է ու տեսախցիկ դրել։ Տեսախցիկն աշխատել է ամսի 10-ից, և մինչև ամսի 20-ը նկարվել ու տեսաձայնագրվել է ամբողջը, անգամ իմ անձնական կյանքը, երբ ես հեռախոսով եմ խոսում: Կանայք հանվում են այդտեղ, ես էլ եմ հանվել, ինձ մազահեռացրել։ Առանց իմանալու` բոլորս մերկացել ենք։ Ինչ որ արել ենք, նկարվել է։ Տարբեր բնագավառի կանայք ու աղջիկներ են գալիս»,– ասել է դիմահարդարը:
Նա պատմել է, որ պատահաբար է հայտնաբերել տեսախցիկը։
«Երբ նկատեցի թարթող կապույտ լույսը, գտա, տեսա՝ մեջը չիպ կա, չիպը հեռախոսով չբացեց, տարա ծրագրովորողի մոտ, չիպը բացեց, տեսնենք` մեջը ամբողջը նկարված է»,– նեշել է Հակոբյանը:
Կյանքն առանց գեղեցկության սրահների, կամ ինչպես են կանայք «դիմակայում» մեկուսացմանը
Աշխատակցուհին տնօրենին հարցրել է, թե ինչու է նման ստոր քայլի գնացել, տնօրենն ասել է, թե դա արել է, քանի որ մտածել է, որ իր աշխատակիցը հաճախորդ ու գումար է գողանում իրենից. «Ասում եմ՝ կադրերում բոլորս մերկ ենք, ի՞նչ եք արել, ասեց՝ լավ եմ արել, դրել եմ, դու ինձնից հաճախորդ ես գողացել, ասել եմ՝ ապացուցի, ասում է՝ գումար ես գողացել, ասել եմ՝ ապացուցի, կադրերում երևում է, որ հաճախորդը կասսայում է վճարում»:
Մետրոսեքսուալներ և հիստերիկներ. ո՞ւմ չեն սիրում Հայաստանի գեղեցկության սրահներում
Հակոբյանը դիմել է ԱԱԾ։ Ազգային անվտանգության ծառայության աշխատակիցները եկել, առգրավել են չիպն ու պատի միջից հանել տեսախցիկը. «Տնօրենն ինձ ասում էր՝ ո՞ւր պետք ա գնաս, բողոքես, ինձ ոչ մեկը ոչ մի բան չի կարող անել…իր տղան քննչական բաժիններից մեկում 3 ամիս է` քննիչ է աշխատում, երևի հույսը քննիչ տղայի վրա է դրել, որ կարող է թացից չոր դուրս գալ: Բայց չի մտածում, որ ինքը խախտել է բարոյական ու իրավական բոլոր օրենքները»:
Դիմահարդարն ուզում է` հիմա տվյալ գեղեցկության սրահ այցելող հաճախորդներն իմանան, որ իրենց գաղտնի տեսագրում են և չայցելեն։
Sputnik Արմենիան դիմեց ԱԱԾ մամուլի ծառայություն, մեզ խոստացան ճշտել, թե ինչ է տեղի ունեցել իրականում և ավելի ուշ տեղեկացնել:
