ԵՐԵՎԱՆ, 12 հունիսի – Sputnik․ ՀՀ վարչապետ Նիկոլ Փաշինյանն այսօր Ազգային ժողովում ներկայացնելով ՀՀ-ում արտակարգ դրությունը ևս մեկ ամսով երկարաձգելու` կառավարության ընդունած որոշումը, ասաց, որ Հայաստանում կորոնավիրուսի համավարակը շարունակում է տարածվել, մարտի 16-ից հայտարարած արտակարգ դրության պայմաններն էլ չեն վերացել:
«Իրավիճակը ճգնաժամային է, և սա պետք է արձանագրել»,- ասաց Փաշինյանը՝ հավելելով, որ կորոնավիրուսը հաղթահարել հնարավոր է միայն վարքագծի փոփոխությամբ:
Վարչապետն ընդգծեց, որ ՀՀ-ում հակահամաճարակային կանոնները չեն պահպանվում, ինչն էլ անհնարին է դարձնում համաճարակի հաղթահարումը՝ անկախ կառավարության ձեռնարկած միջոցներից:
«Մենք դիմակների կրման պարտադիր պահանջն ընդունել ենք հունիսի 3-ին: Այսօր հունիսի 12-ն է: Եվ ես ուզում եմ ընդգծել՝ եթե այս ընթացքում այդ պարտադիր պահանջը պահպանվեր, մենք այսօր կունենայինք թվերի նվազում»,- ասաց վարչապետը՝ շեշտելով, որ թվերը ոչ միայն չեն նվազում, այլև շարունակում են աճել:
ՀՀ վարչապետն առաջարկեց այսօրվա որոշումը ֆիքսել որպես զրոյական կետ ու պարտավորվել այս պահից սկսած` հետևել հակահամաճարակային կանոններին:
«Ես ինքս պարտավորվում եմ որպես նախկինում այդ կանոնները պատշաճ չպահպանած մարդ, որի ապացույցն այն է, որ ես ինքս վարակվեցի կորոնավիրուսով ու բուժվեցի, այս ամբիոնից պարտավորվում եմ անձամբ ճշգրտորեն պահպանել հաստատված բոլոր կանոններն առանց բացառության ու կոչ եմ անում ՀՀ բոլոր քաղաքացիներին հետևել այս օրինակին»,- ասաց Փաշինյանը:
Դեռ վաղ է խոսել կորոնավիրուսի աճի տեմպերի անկման մասին. Թորոսյան
ՀՀ կառավարության արտահերթ նիստում այսօր որոշում ընդունվեց 2020 թվականի մարտի 16-ին Հայաստանում հայտարարված արտակարգ դրության ժամկետը մինչև 2020 թվականի հուլիսի 13-ը, ժամը 17:00-ը երկարացնելու մասին:
Հիշեցնենք` հունիսի 12-ի, ժամը 11:00-ի դրությամբ Հայաստանում հաստատվել է կորոնավիրուսային հիվանդության ընդհանուր 15281 դեպք, որոնցից 5639-ն առողջացած, 258-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 9298 պացիենտ: Ընդհանուր առմամբ կատարվել է 77 686 թեստավորում:
Վերջին մեկ օրում ունենք կորոնավիրուսային հիվանդությամբ հաստատված 612 նոր դեպք և 173 առողջացած։
ՀՀ Զինված ուժերի ղեկավարությունը պարբերաբար կորոնավիրուսի թեստ է հանձնում. ինչու
