ԵՐԵՎԱՆ, 11 հունիսի – Sputnik. ՀՀ կառավարությունը որոշել է հաշվել, թե քանի խոշոր եղջրավոր անասուն կա Հայաստանում: Կենդանիների համարակալման և հաշվառման ծրագիրն այսօր ՀՀ կառավարության նիստում ներկայացրեց Էկոնոմիկայի նախարար Տիգրան Խաչատրյանը:
«Նախագծի ընդունումը պայմանավորված է ՀՀ օրենսդրության կիրարկման ապահովման, մարդկանց և կենդանիների համար ընդհանուր վարակիչ և ոչ վարակչ հիվանդությունների դեմ (բրուցելոզ, սիբիրախտ, դաբաղ և այլն) պայքարի կազմակերպման արդյունավետության, սննդամթերքի անվտանգության, դրա որակի վերահսկման և ազգաբնակչությանը բարորակ մթերք մատակարարելու խնդիրների լուծման անհրաժեշտությամբ»,- ասաց Խաչատրյանը:
Ծրագրի առաջին փուլով՝ մինչև 2020 թ-ի ավարտը նախատեսվում է հաշվառել ՀՀ-ում առկա շուրջ 800 000 գլուխ խոշոր եղջրավոր կենդանիներին, որի համար անհրաժեշտ է ձեռք բերել 1.6 մլն ականջապիտակ՝ յուրաքանչյուր կենդանու համար երկուական ականջապիտակ հաշվարկով: Իսկ ծրագրի ընդհանուր բյուջեն կկազմի շուրջ 1 մլրդ 440 մլն ՀՀ դրամ:
Նախարարը նաև հյտնեց, որ նպատակ կա նույն համակարգը կիրառել նաև այլ կենդանատեսակների՝ այծերի ու ոչխարների նկատմամբ:
Միսը, կարագը, ձեթը ոչ միայն չեն թանկանա, այլև կէժանանան, բայց ոչ ընդմիշտ
«Այս ծրագրի իրականացման արդյունքում մենք երկու խնդիր ենք լուծում՝ նախ հստակ կիմանանք, թե երկրում քանի խոշոր եղջրավոր անասուն կա և կլուծենք սննդի անվտանգության ու ինչ-որ առումով նաև հետագա ծելիության խնդիրը: Այսինքն՝ կիմանանք, թե այս համարանիշով կենդանին որ սպանդանոցում մորթվեց, որտեղ իրացվեց և այլն»,- ասաց վարչապետ Նիկոլ Փաշինյանը:
Նախագծի համաձայն` 2020-2023 թվականների ընթացքում կհամարակալվի և կհաշվառվի հանրապետությունում առկա ավելի քան 1.5 մլն գլուխ ԽԵԿ ՝ մեկնարկային տարում ՝800 հազար գլուխ, հաջորդ տարիներին՝ տարեկան 245 հազար գլուխ:
