ԵՐԵՎԱՆ, 10 հունիսի – Sputnik. ՀՀ տարածքային կառավարման և ենթակառուցվածքների նախարար Սուրեն Պապիկյանը այսօր ԱԺ-ում ասաց, որ մարզային տրանսպորտի շահագործման համար մրցութային փաթեթները վաղուց պատրաստ են, բայց կորոնավիրուսը խանգարեց դրանց անցկացմանը:
«Այնուամենայնիվ, մինչև տարեվերջ մենք կունենանք այդ նախադեպը որևէ մարզում: Դրան զուգահեռ նաև առավել շատ միավորված համայնքներ ունեցող որևէ մարզում փորձարկելու ենք նաև երկրորդ մոդելը, այն է՝ պետական աջակցությամբ համայնքներին տրամադրել տրանսպորտային միջոցներ, որոնք ուղևորափոխադրումներ կիրականացնեն խոշորացված համայնքի մաս կազմող բնակավայրերից դեպի կենտրոն, մարզկենտրոն ու մայրաքաղաք»,- նշեց Պապիկյանը:
Հիշեցնենք, որ կորոնավիրուսի հետ կապված իրավիճակի պատճառով մարտի վերջից հանրային տրանսպորտը Հայաստանում դադարել էր գործել, իսկ ապրիլի սկզբից` նաև մետրոն։ Մայիսի 18-ից հանրային տրանսպորտի աշխատանքը վերականգնվել է, բայց հակահամաճարակային պարտադիր պահանջների պահպանման պայմանով: Արդյունքում հատկապես մարզային որոշ փոխադրողներ հրաժարվում են աշխատել այդ պայմաններում: Բնակչության շրջանում արդեն մի քանի բողոքի ակցիաներ են տեղի ունեցել: Մարզերի բնակիչները պնդում են, որ մնացել են Երևանից կտրված ու չեն կարողանում հասնել աշխատանքի:
Հայաստանում կորոնավիրուսով վարակվածների թիվն ավելացել է 428–ով և հասել 14103–ի
