ԵՐԵՎԱՆ, 10 հունիսի – Sputnik. Երևանի «Շտապօգնության» ծառայության ավելի քան 500 աշխատակից ապրիլ և մայիսի ամիսներին պարգևավճարներ են ստացել։ Այս մասին Sputnik Արմենիայի հետ զրույցում ասաց «Շտապօգնություն» ՓԲԸ–ի տնօրեն Թագուհի Ստեփանյանը։
Ավելի վաղ ԲՀԿ–ական պատգամավոր Արման Աբովյանը Facebook–ի իր էջում հայտնել էր, որ շտապ բուժօգնության ծառայության վարորդներից մեկը զանգահարել է իրեն և ասել, որ այս ամիս «շտապօգնության» ոչ մի աշխատակից պարգևավճար չի ստացել։
Պատգամավորի գրառմանն արձագանքել էր ՀՀ առողջապահության նախարարի խորհրդական Աշոտ Սարգսյանը, որը Facebook–ի իր էջում հավաստիացրել է՝ Առողջապահության նախարար Արսեն Թորոսյանը նախատեսում է պարգևավճարներ հատկացնել շտապօգնության աշխատակիցներին ինչպես նախորդ, այնպես էլ մայիս ամսվա համար:
««Շտապօգնության» ավելի քան 500 աշխատակից արդեն իսկ պարգևավճարներ են ստացել ինչպես ապրիլ, այնպես էլ մայիս ամսվա համար։ Չգիտեմ, թե կոնկրետ ով է զանգահարել Արման Աբովյանին։ Սակայն նա կարող էր այդ հարցը պարզել մեզնից»,– մեզ հետ զրույցում նշեց Ստեփանյանը։
Նրա խոսքով` պարգևավճարի չափը կազմում է 100 հազարից մինչև 150 հազար դրամ։
Ստեփանյանը հավելեց, որ պարգևավճարներ են ստացել բոլոր նրանք, ովքեր մասնակցում են կորոնավիրուսային վարակի դեմ պայքարին։
Միևնույն ժամանակ, հունիս ամսվա պարգևավճարների հարցը, Ստեփանյանի խոսքով, դեռ բաց է մնում։
Հունիսի 10-ի դրությամբ Հայաստանում կորոնավիրուսով վարակվածների թիվը հասել է 14103-ի։ Նախորդ մեկ օրվա ընթացքում 428 նոր դեպք է գրանցվել։ Բուժվածների թիվը 5226 է, բուժվողներինը՝ 8573։ Ընդհանուր առմամբ կատարվել է 73156 թեստավորում։
ՀՀ–ում ևս 13 մարդ է մահացել. Covid 19-ի պատճառով մահացածներից ամենաերիտասարդը 54 տարեկան է
Հիշեցնենք, որ Հայաստանում մարտի 16-ից արտակարգ դրության ռեժիմ է գործում, որը երկարացվել է մինչև հունիսի 13-ը։ Մայիսի 18-ից հանրապետությունում գործում է հանրային տրանսպորտը։
Բացվել են նաև առևտրի կենտրոնները, մոլերը, ամբողջությամբ չեղարկվել է հանրային սննդի օբյեկտների աշխատանքի արգելքը։ Հունիսի 4-ից սահմանվել է պարտադիր «դիմակային ռեժիմ»։
