ԵՐԵՎԱՆ, 9 հունիսի – Sputnik. Վատիկանում նախկին դեսպան, Սերժ Սարգսյանի փեսա Միքայել Մինասյանի համակարգչի ինֆորմացիան պետեկամուտների կողմից ենթակա է ուսումնասիրման։ ՀՀ արդարադատության նախարար Ռուստամ Բադասյանը նման կարծիք հայտնեց Ազգային ժողովում լրագրողների հետ զրույցում` պատասխանելով հարցին, թե ե՞րբ կարող են ուսումնասիրության առարկա դառնալ Մինասյանի համակարգչում գտնված ֆայլերը սեփականության ձեռքբերման մասով։
«Ես պատրաստ եմ ժառանգել Սերժ Սարգսյանի մեղքերը»․ Միքայել Մինասյան
Հայտնել էինք, որ վարչապետ Նիկոլ Փաշինյանի կնոջ եղբայրը՝ պատգամավոր Հրաչյա Հակոբյանը, Facebook-ում գրառում էր արել` հայտնելով, որ պարզվում է` խուզարկություններից մեկի ժամանակ գտնվել է Մինասյանի հին համակարգիչը: Ֆայլերը ջնջված են եղել, բայց մասնագետներին հաջողվել է վերականգնել են մոտ 9 000 ֆայլ։
«Կարծում եմ` հայտնի է, թե երբ են նման ինֆորմացիան ուսումնասիրում։ Կոռուպցիոն բնույթի հիմքով մեղադրանք առաջադրված լինելը հիմքերից մեկն է, որպեսզի գույքի մասով ուսումնասիրություն իրականացվի»,–ասաց Բադասյանը։
Հիշեցնենք, որ Հակոբյանը հայտնում էր, որ վերականգնված ֆայլերում տվյալներ են եղել նաև Միքայել Մինասյանին պատկանող սեփականությունների մասին՝ ամբողջական ցանկերով, օֆշորային հաշիվներով ու ընկերություններով։
Նշենք, որ մինչ այդ ՊԵԿ-ը հայտարարություն էր տարածել այն մասին, որ ՀՀ երրորդ նախագահ Սերժ Սարգսյանի փեսա, Վատիկանում ՀՀ նախկին դեսպան Միքայել Մինասյանին առաջադրված մեղադրանքը լրացվել է մի քանի նոր բացահայտված դրվագներով։
Մասնավորապես՝ քրեական գործով բացահայտվել է, որ Միքայել Մինասյանը 2012-2018թթ. կասկածելի աղբյուրներից ստացած խոշորածավալ ֆինանսական միջոցներով, քողարկված եղանակով, Շոտլանդիայում հաշվառված օֆշորային «Ուոլտեքս Էքսպրես Էլ Փի» կազմակերպության միջոցով և ապա իր մտերիմներից Ռոզա Ստեփանյանի միջոցով հանդիսացել է «Սպայկա» ՍՊ ընկերության 49 տոկոս բաժնեմասի փաստացի բաժնետերը, որի վերաբերյալ տվյալները չի ներառել իր՝ պաշտոնատար անձի հայտարարագրերում:
Միքայել Մինասյանի մեղադրանքն ավելացվել է նոր բացահայտումներով. «Սպայկան» և Ռոզա Ստեփանյանը
Մինչ այս նոր դրվագների ավելացումը ՊԵԿ-ում քննվող քրեական գործով Միքայել Մինասյանին մեղադրանք էր առաջադրվել ՀՀ քրեական օրենսգրքի 310.1-րդ հոդվածի 1-ին մասով (ապօրինի հարստանալը), 314.3-րդ հոդվածի 2-րդ մասով (հայտարարագրման ենթակա առանձնապես խոշոր չափերի տվյալները թաքցնելը) և 190-րդ հոդվածի 3-րդ մասի 1-ին կետով (առանձնապես խոշոր չափերի հանցավոր ճանապարհով ստացված գույքն օրինականացնելը):
Մինասյանն այժմ հետախուզման մեջ է։
Վանեցյանն ու Մինասյանն ընդդեմ Փաշինյանի. արդյո՞ք ՀՀ վարչապետը մտահոգվելու պատճառ ունի
