ԵՐԵՎԱՆ, 8 հունիսի – Sputnik. ՀՀ վարչապետ Նիկոլ Փաշինյանը պարետատան նիստից հետո կառավարությունում կայացած ճեպազրույցի ժամանակ հայտնեց, որ վերջին օրերին հակահամաճարակային կանոնների պահպանման որոշակի դրական դինամիկա է արձանագրվում։
Ավելի վաղ հայտնել էինք, որ Փաշինյանի և նրա ընտանիքի անդամների կրկնակի թեստերի պատասխանը բացասական է, և նա արդեն իսկ վերադարձել է բնականոն աշխատանքի։
«Մեր սկսած` հակահամաճարակային կանոնները պահելու միջոցառման արդյունքները կտեսնենք մեկ շաբաթ անց, սակայն արդեն իսկ նկատելի փոփոխություններ կան կանոնների պահպանման առումով»,–ասաց Փաշինյանը։
Նրա խոսքով` կորոնավիրուսով պայմանավորված իրավիճակի առնչությամբ ամենօրյա քննարկումներ են անում։ Վարչապետը հուսով է, որ այս ամենից հետո մի շարք փոփոխություններ կլինեն` հերթ կանգնելու մշակույթից սկսած։ Փաշինյանը կարծում է, որ գնում ենք ճիշտ ճանապարհով։
Վարչապետը հայտնեց նաև, որ կձևավորվեն կամավորների` երկուական անձանցից բաղկացած թիմեր և, պահպանելով հակահամաճարակային կանոնները, մյուսներին էլ կտեղեկացնեն դրանց պահպանման կարգուկանոնի մասին։
Նշենք, որ վերջին մեկ օրում Հայաստանում կորոնավիրուսով վարակվածների թիվն ավելացել է 195–ով և հասել 13 325–ի։
Հիշեցնենք` ՀՀ կառավարությունը մայիսի 14–ի նիստում որոշեց արտակարգ դրությունը երկարացնել ևս մեկ ամսով։ Այն կտևի մինչև հունիսի 13–ը` ժամը 17։00–ը ներառյալ։
Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Մայիսի 18–ից Հայաստանում աշխատում է նաև հասարակական տրանսպորտը, բայց ուղևորներն ու վարորդները պետք է անպայման պաշտպանիչ դիմակով ու ձեռնոցով լինեն։
Ինչ է պետք անել կորոնավիրուսի դեմն առնելու համար. վարակաբանության պրոֆեսորի կարծիքը
Հունիսի 4-ից արտակարգ դրության ընթացքում կիրառվող կարգավորումներում փոփոխություններ և լրացումներ են ուժի մեջ մտել։ Այսուհետ բոլոր հանրային բաց տարածքներում դիմակ դնելը պարտադիր է։ Հանրային բաց վայրերում դիմակ կարող են չդնել միայն մինչև 6 տարեկան երեխաները, հեծանիվ վարողներն ու ֆիզիկական վարժություններ անողները։
