ԵՐԵՎԱՆ, 8 հունիսի – Sputnik. Պարետատան այսօրվա նիստից հետո կառավարությունում կայացած ճեպազրույցի ժամանակ ՀՀ առողջապահության նախարար Արսեն Թորոսյանը հայտնեց, որ կորոնավիրուսով վարակվածներից 403–ի վիճակն այս պահին ծանր է, 94–ինը` ծայրահեղ ծանր։
«Ծանր վիճակում գտնվողների թիվը կայուն է, բայց բացարձակ թվով շատ է։ Պետք է այնպես անենք, որ ծանր վիճակում գտնվողների քանակը նվազի, ինչը կլինի միայն այն դեպքում, երբ վարակվածների թվի նվազում ունենանք»,–ասաց նախարարը։
Թորոսյանի խոսքով` առողջապահական համակարգը նման մոբիլիզացիա երբեք չի ունեցել։ Ընդհանուր առմամբ, ըստ նախարարի, 15 տոկոսով ընդլայնվում է առողջապահական համակարգի ծավալները։ Ի պատասխան հնչող հարցերի, թե ինչու ծավալների մեծացման հետ կապված աշխատանքներ չեն տարվել` նախարարը նշեց, որ համակարգի ծավալի ընդլայնման ուղղությամբ նոր աշխատանքներ են եղել։ Օրինակ` որոշվել է, որ Վեդիի, Սպիտակի, Դիլիջանի, Մարտունու ԲԿ–ները մեծացնեն իրենց ծավալները։ Երևանյան հիվանդանոցներում նույնպես ծավալների ընդլայնում է տեղի ունեցել` «Արմենիա» ԲԿ–ն նույնպես կզբաղվի կորոնավիրուսով վարակվածների բուժմամբ։
Նա կրկին կոչ արեց պահպանել հակահամաճարակային կանոնները հատկապես ձեռնարկություններում։
Նշենք, որ վերջին մեկ օրում Հայաստանում կորոնավիրուսով վարակվածների թիվն ավելացել է 195–ով և հասել 13 325–ի։
Կորոնավիրուսը ևս 11 մարդու կյանք է խլել Հայաստանում. ամենաերիտասարդը 52 տարեկան կին է
Հիշեցնենք` ՀՀ կառավարությունը մայիսի 14–ի նիստում որոշեց արտակարգ դրությունը երկարացնել ևս մեկ ամսով։ Այն կտևի մինչև հունիսի 13–ը` ժամը 17։00–ը ներառյալ։
Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Մայիսի 18–ից Հայաստանում աշխատում է նաև հասարակական տրանսպորտը, բայց ուղևորներն ու վարորդները պետք է անպայման պաշտպանիչ դիմակով ու ձեռնոցով լինեն։
Հունիսի 4-ից արտակարգ դրության ընթացքում կիրառվող կարգավորումներում փոփոխություններ և լրացումներ են ուժի մեջ մտել։ Այսուհետ բոլոր հանրային բաց տարածքներում դիմակ դնելը պարտադիր է։ Հանրային բաց վայրերում դիմակ կարող են չդնել միայն մինչև 6 տարեկան երեխաները, հեծանիվ վարողներն ու ֆիզիկական վարժություններ անողները։
Նիկոլ Փաշինյանը ստացել է իր ընտանիքի կրկնակի թեստերի պատասխանները
