ԵՐԵՎԱՆ, 4 հունիսի – Sputnik. «Արմենիա» բժշկական կենտրոնի Նյարդավիրաբուժության բաժանմունքի վարիչ Դավիթ Պատրիկյանը բուժվել է կորոնավիրուսից և երկու շաբաթ բուժում ստանալուց հետո դուրս գրվել հիվանդանոցից։ Տեղեկությունը հայտնում է «Սուրբ Գրիգոր Լուսավորիչ» բժշկական կենտրոնի մամուլի խոսնակ Ծովինար Խաչատրյանը։
«Դավիթ Պատրիկյանը մայիսի 21-ին բուժկենտրոն էր տեղափոխվել նոր կորոնավիրուսային վարակով և երկկողմանի ծանր թոքաբորբով։ Նրա խոսքով` իր փրկվելը հավասար էր հրաշքի, ինչի համար շնորհակալություն է հայտնում գործընկերներին», - Facebook-ում գրել է Խաչատրյանը։
Պատրիկյանը 68 տարեկան է, ունի շաքարային դիաբետ, սրտանոթային հիվանդություններ, այսինքն՝ եղել է ռիսկային խմբում, նրա՝ կորոնավիրուսով վարակվելը կարող էր ճակատագրական լինել։ Բժշկին վարակը փոխանցվել էր իր բուժառուից։
Ավելի վաղ Հայաստանում կորոնավիրուսը հաղթահարել էին 101-ամյա Նազանի Սիմոնյանը, 96-ամյա Սերյոժա Ստեփանյանը, 91-ամյա Սրբուհի Մուրադյանը։
Հայաստանում կորոնավիրուսով վարակվածների թիվն արդեն հասել է 11 221-ի, առողջացել է 3468 մարդ, շարունակում են բուժվել 7509-ը, վարակվածներից 176–ը մահացել են։
