ԵՐԵՎԱՆ, 4 հունիսի – Sputnik. Հայաստանում կորոնավիրուսով վարակվածների թիվը մեկ օրում ավելացել է 697-ով։ Տեղեկությունը հայտնեց ՀՀ վարչապետ Նիկոլ Փաշինյանը։
«Վատ լուր ունեմ։ Համաճարակային վիճակն ավելի է վատանում։ Ունենք 697 նոր դեպք։ Սա նշանակում է, որ մենք արդեն մի իրավիճակում ենք, երբ ունենք հիվանդներ, որոնք հոսպիտալացման կարիք ունեն, սակայն չենք կարողանում հոսպիտալացնել»,– Facebook—ի ուղիղ եթերում հայտնեց նա։
Վարչապետի խոսքով` այսօր երկրում կա մոտ 20 հազար մարդ, որոնք չգիտեն, որ իրենք հիվանդ են։ Վարչապետի խոսքով` նրանք են դառնում վարակի հիմնական տարածողերը, և այդ մարդիկ սրճարանում են, փողոցում են, աշխատանքի վայրում են։
«Որպեսզի վարակի տարածում չլինի, բոլորս բոլորիս պետք է վերաբերվենք որպես վարակակիր և կիրառենք կանխարգելիչ միջոցներ։ Երեկ կորոնավիրուսից մահացել է 6 մարդ, ևս 9 մահ էլ գրանցվել է, երբ բժիշկները մահվան պատճառն այլ են գնահատել, բայց նրանք վարակված են եղել կորոնավիրուսով»,– ասաց վարչապետը` ցավակցելով մահացածների հարազատներին։
Վարչապետի խոսքով` սա օրհասական պահ է, և մենք «դուխով» և բարձր կարգապահությամբ կհաղթահարենք այն։ Պահպանել հակահամաճարակային կանոններն ու վերահսկել դրանց կատարումը․ Փաշինյանի խոսքով՝ Հայաստանում պետք է սկսվի զանգվածային հակահամաճարակային շարժում։
Փաշինյանը նաև խոսեց իրենց ընտանիքի մասին։
«Ասեմ նաև, որ մենք երեկ ավելի մանրամասն բժշկական հետազոտություն անցանք` ես, Աննան ու Մարիամը, և արձանագրվեց, որ թոքերի հետ կապված որևէ խնդիր չունենք։ Ըստ էության, լիարժեք ասիմպտոմ ենք տանում հիվանդությունը»,– նշեց նա։
Հիշեցնենք` այսօրվանից՝ հունիսի 4-ից, արտակարգ դրության ընթացքում կիրառվող կարգավորումներում փոփոխություններ և լրացումներ են ուժի մեջ մտել։ Այսուհետ բոլոր հանրային բաց տարածքներում դիմակ կրելը պարտադիր է։ Հանրային բաց վայրերում դիմակ կարող են չկրել միայն մինչև 6 տարեկան երեխաները, հեծանիվ վարողներն ու ֆիզիկական վարժություններ անողները։
Փաշինյանը հասկացել է` ինչու մարդիկ չեն հետևում անվտանգության նորմերին
