ԵՐԵՎԱՆ, 3 հունիսի – Sputnik. ԱԺ–ն քննարկում է պրոֆիլային հանձնաժողովների փորձագետների աշխատավարձերը բարձրացնելու և նոր պաշտոններ ստեղծելու հարցը։
«Իմ քայլը» դաշինքի պատգամավոր, ՀՀ ԱԺ կրթության, գիտության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանի խոսքով` օրինագիծն ուղղված է մշտական հանձնաժողովների աշխատանքների կատարողականի և արդյունավետության բարձրացմանը։
Նրա դիտարկմամբ՝ հանձնաժողովի նախագահը պետք է նախապես հանձնաժողովի անդամներին ներկայացնի նիստին հրավիրված մասնագետների ցանկը, ինչպես նաև հանձնաժողովին ուղղված նամակները։ ԱԺ վերջին նստաշրջանին նա պետք է հաշվետվություն ներկայացնի հանձնաժողովի աշխատանքի, ինչպես նաև կոնկրետ պատգամավորների վերաբերյալ։
«Մենք նաև ավելացնում ենք քվորումը` հանձնաժողովի անդամների ¼–ից մինչև պատգամավորների կեսից ավելին։ Նախկինում հաճախ քվորումի հարց էր առաջանում, քանի որ հանձնաժողովի անդամներին դժվար էր նիստերին հավաքելը։ Կարծում ենք, որ այս խորհրդարանում մենք նման խնդիր չունենք»,– նշեց Հայրապետյանը։
Աննա Հակոբյանն ու եղբայրը դատի են տվել Միքայել Մինասյանին
Ըստ Հայրապետյանի՝ նախկինում մի քանի պատգամավոր կարող էր եզրակացություն ներկայացնել օրինագծի վերաբերյալ, որի հիման վրա որոշում էր կայացվում ԱԺ լիագումար նիստում։ Այդ դեպքում լեգիտիմության հարց է առաջանում։ Հանձնաժողովում որքան շատ պատգամավոր է եզրակացություն ներկայացնում, այդքան որոշումն ավելի լեգիտիմ է։
Հանձնաժողովի նախագահն ընդգծեց նաև, որ օրինագծի համազեկուցողներ չեն կարող լինել փաստաթղթի համահեղինակ կամ համապատասխան նախաձեռնությամբ հանդես եկող կուսակցության անդամները, որպեսզի շահերի բախում չլինի։ Բացի այդ, օրինագծի վերաբերյալ գրավոր առաջարկներ ընթերցումների ընդմիջումներում կկարողանան մտցնել ոչ միայն պրոֆիլային հանձնաժողովի անդամները, այլև մյուս պատգամավորները։
Խորհրդարանը օրենքների ընդունումից հետո դրանց իրականացումը վերահսկելու նպատակով կկարողանա նաև նախարարների և գործադիր իշխանության այլ պատասխանատու ներկայացուցիչների հրավիրել։
Փոփոխություններով առաջարկվում է նաև բարձրացնել մշտական հանձնաժողովների փորձագետների աշխատավարձերը։ Դա, Հայրապետյանի գնահատմամբ, թույլ կտա պրոֆեսիոնալ կադրեր ներգրավել։
Ավելին, հանձնաժողովի նախագահի խորհրդականի և խմբակցության խորհրդականի նոր հաստիքներ են նախատեսված։
«Լուսավոր Հայաստանից» պատգամավոր Մանե Թանդիլյանի կարծիքով՝ քվորումն ավելացնելու անհրաժեշտություն չկա, քանի որ դա անհրաժեշտ քանակի բացակայության պատճառով կբարձրացնի հանձնաժողովի նիստերի ձախողման շանսերը:
Հայտնի է ԱԺ նախագահ Արարատ Միրզոյանի թեստի պատասխանը
Արդարադատության փոխնախարար Վահե Դանիելյանն իր հերթին ուշադրություն հրավիրեց առանց այն էլ ուռճացված պետական ապարատի, ինչպես նաև նրա աշխատանքի արդյունավետությունը բարձրացնելու անհրաժեշտության վրա։
«Մեր կարծիքով, լրացուցիչ պետք է հիմնավորել նոր պաշտոնների ստեղծումը»,– նշեց Դանիելյանը, հավելելով, որ հանձնաժողովի փորձագետները բավարար են, հատկապես համավարակի պայմաններում։
Նա նաև կասկածի տակ դրեց փորձագետների համար աշխատավարձի բարձր դրույքաչափ (6) ֆիքսելու անհրաժեշտությունը։
ԱԺ խոսնակ Արարատ Միրզոյանը ուշադրություն հրավիրեց այն հանգամանքին, որ «ավանդույթի համաձայն» գործադիր իշխանությունը միտումնավոր չի միջամտում խորհրդարանի ներքին աշխատանքի կազմակերպմանը։
«Կարծում եմ, որ դա բավական գեղեցիկ ավանդույթ է, և մենք պետք է այն պահպանենք», – շեշտեց Միրզոյանը, հավելելով, որ պետական ապարատում կրճատումները պետք է սկսել այլ կառույցներից։
Դրանից հետո Հայրապետյանը նշեց, որ խոսքը բավական սահմանափակ ռեսուրսների մասին է և նման գնահատականներ տալ, այդ թվում՝ համավարակի մասին հիշեցնել, պետք չէ։
Հանրաքվեն կչեղարկվի. Հրայր Թովմասյանը և ՍԴ դատավորները կշարունակեն պաշտոնավարել
