ԵՐԵՎԱՆ, 31 մայիսի – Sputnik. Տաճարն ավերած հրդեհից ավելի քան մեկ տարի փակ մնացած Նոտր Դամ դե Պարիի առջևի հրապարակը մայիսի 31-ին կրկին բացվեց այցելուների համար: Տեղեկությունը հայտնում է ՌԻԱ Նովոստին։
Հրդեհից հետո կապարի կոնցենտրացիան տաճարի տարածքում և մոտակա տներում երբեմն մի քանի անգամ գերազանցել է թույլատրելիի չափը: Այստեղ բազմաստիճան մաքրման աշխատանքներ են իրականացվել, որոնց ընթացքում, մասնավորապես, ախտահանվել են նստարանները, լապտերներն ու տարածքը։
«Փարիզի իշխանությունները, եպիսկոպոսարանը և ընկերությունը, որը զբաղվում է Նոտր Դամ դե Պարիի պահպանության և վերականգնման գործով, ողջունում են հրապարակի բացումը, որի համար թույլտվություն է տվել ոստիկանապետը մայիսի 29-ին Փարիզի շրջանային գործակալության դրական արձագանքից հետո»,– նշված է Փարիզի քաղաքապետարանի հաղորդագրության մեջ։
Չնայած շոգին, բացմանը մասնակցել են Փարիզի մի քանի տասնյակ բնակիչներ, որոնք շուրջ 2 ամիս խիստ կարանտինային ռեժիմում էին։
Թուրքիան գիտակցաբար մշակութային ցեղասպանության է գնացել, իսկ Աստվածամոր տաճարում աղետ էր
«Երեկ վերջապես բացվեցին այգիները, ես գնում էի զբոսնելու։ Եվ լուրերով տեսա, որ բացվում է հրապարակը։ Սա ոչ միայն հավատացյալների, այլև բոլորի համար մեծ ուրախություն է։ Նոտր Դամը մեր խորհրդանիշն է։ Իսկ հիմա մեզ լավ նորություններ շատ են պետք»,– ՌԻԱ Նովոստիին է ասել փարիզցիներից մեկը։
Հրապարակի բացման առիթով այստեղ են այցելել նաև Փարիզի քաղաքապետ Անն Իդալգոն, Ֆրանսիայի մշակույթի նախարար Ֆրանկ Ռիեսթերը և Փարիզի արքեպիսկոպոս Միշել Օպետին, որոնք Նոտր Դամի դիմաց անցկացրել են քառորդ ժամ։ Կորոնավիրուսի համավարակի պատճառով, որը երկրում դեռ շարունակվում է, բոլորը դիմակներ են կրել։
Հիշեցնենք, որ Փարիզի Աստվածամոր տաճարի հրդեհը բռնկվեց 2019 թվականի ապրիլի 15-ի երեկոյան։ Այն մարելու համար հրշեջները աշխատեցին 12 ժամ։ Հրդեհի հետևանքով փլուզվեց տաճարի աշտարակն ու ոչնչացվեց լեգենդար շինության տանիքի 1/3-ը։
Փարիզի այրված տաճարի համար 2 օրում ավելի քան 1 միլիարդ եվրո է հավաքվել. ով ինչքան է տվել
Ֆրանսիայի նախագահ Էմանուել Մակրոնը հայտարարել է տաճարը 5 տարում վերականգնելու ամբիցիոզ նպատակի մասին, թեև փորձագետներից շատերն ասում են, որ վերակառուցումը 10-15 տարի կտևի։
