ԵՐԵՎԱՆ, 25 մայիսի – Sputnik. ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանն այսօր ԱԺ-ում հայտնեց, որ կորոնավիրուսի տարածմամբ պայմանավորված` բժշկական դիմակների բիզնեսում գերիշխող դիրքի չարաշահման ու հակամրցակցային համաձայնության կասկածներ են առաջացել:
Գևորգյանի խոսքով` շուկայի ուսումնասիրության ընթացքում հանձնաժողովը դիտարկել է այդ ոլորտում աշխատող հայաստանյան 7 խոշոր ընկերությունների գնային քաղաքականությունն ու հանգել այն եզրակացության, որ շահույթները չափազանց մեծ են:
«Տնտեսվարողները մի հատ մեծածախ գնում են իրականացնում, որտեղ մարժա է գումարվում, այնուհետև մի հատ էլ դեղատնային ցանցում է մարժա կիրառվում, և այս մարժայի չափը մեզ անհանգստացրել է»,- ասաց նա:
Ընդ որում` այս սկզբունքը կիրառվում է ինչպես տեղական արտադրության, այնպես էլ ներկրվող դիմակների վրա:
Ներկրվող դիմակների գները ևս, Գևորգյանի խոսքով, այս ընթացքում աճել են շուրջ 10 տոկոսով՝ պայմանավորված համաշխարհային շուկայում դրանց գների բարձրացմամբ:
Գևորգյանը հայտնեց, որ տնտեսական մրցակցության պաշտպանության պետական հանձնաժողովն ավարտել է դիմակների շուկայի ուսումնասիրությունը, և հանձնաժողովի վաղվա նիստում գերիշխող դիրքի չարաշահման ու հակամրցակցային համաձայնության հիմքով վարույթ կհարուցվի:
«Այս իրավախախտումը չափազանց ծանր է, և պատասխանատվությունը չափազանց մեծ է՝ նախորդ տարվա ամբողջ շրջանառության հասույթի մինչև 10 տոկոսը: Ընդ որում, եթե կա անձանց խումբ, այսինքն՝ փոխկապակցված են տնտեսվարող սուբյեկտները, ապա բոլորի կումուլյատիվ հասույթի մինչև 10 տոկոսը»,- պարզաբանեց հանձնաժողովի նախագահը:
Նշենք, որ հանձնաժողովի ուսումնասիրության համաձայն` Հայաստանում այսօր վաճառվող ամենացածորակ բժշկական դիմակի ամենացածր գինը 220 դրամ է:
Վերջին մեկ օրում Հայաստանում կորոնավիրուսով վարակվածների թիվն ավելացել է 452-ով և դարձել 7113։
«Ես դիմակաֆոբ եմ»․ ինչպես են քաղաքացիներն ու մասնագետները վերաբերվում դիմակ կրելուն
