ԵՐԵՎԱՆ, 23 մայիսի - Sputnik. ՀՀ վարչապետ Նիկոլ Փաշինյանը շարունակում է իր աշխատանքային շրջայցը Արարատի մարզում։ Վերին Դվին համայնքում վարչապետին տեսնելու համար մեծ թվով գյուղացիներ էին հավաքվել։ Վարչապետն ինքն էլ զարմացավ, թե որքան մարդ է եկել իրեն տեսնելու։
«Էս ինչքա՞ն շատ մարդ է հավաքվել, նախապես իմացե՞լ են, որ գալու ենք»,- հարցրեց վարչապետը։
Գյուղացիներն էլ կատակեցին, թե իրենց սովորությունն է այդպես, միշտ են հավաքվում։ Ի պատասխան դրան էլ վարչապետը հիշեցրեց, որ համավարակի պատճառով հավաքվել չի կարելի։ Չնայած Փաշինյանի հիշեցմանը, վարչապետի ամեն քայլի հետ նրան շրջապատած գյուղացիների թիվն ավելանում էր։ Յուրաքանչյուրը եկել էր անձամբ իր հարցը վարչապետին ուղղելու, իր խնդրի մասին պատմելու։
Գյուղացիները դժգոհում են, որ բանկերը վարկեր չեն տրամադրում, պահանջում են երաշխիqներ։ Գյուղացիներն առաջարկեցին` այնպիսի մեխանիզմ մշակվի, որ ավագանին իրավունք ունենա երաշխավոր լինելու։
Պարզ ու հին տարբերակ. ցուրտ Աշոցքում գյուղացին հնդկաձավար ու նույնիսկ ելակ է աճեցնում
Գյուղացիները նշեցին, որ անգամ կոոպերատիվներ են ցանկանում կազմել, որ գոնե միասին կարողանան անհրաժեշտ վարկ ստանալ, բանկերը կրկին մերժում են։
Էկոնոմիկայի նախարար Տիգրան Խաչատրյանը տեղում ներկայացրեց գյուղացիական տնտեսությունների համար մշակված աջակցության ծրագիրը։ Նրա խոսքով՝ կոոպերատիվի դեպքում կառավարությունը համաֆինանսավորելու է վարկի 50-75 տոկոսը, դա նշանակում է, որ գյուղացիները պետք է գրավ առաջարկեն միայն գումարի մնացած մասի համար վարկ ստանալու նպատակով։
Փաշինյանն էլ ավելացրեց, որ փորձում են հիմա այնպիսի մեխանիզմ ստեղծել, որ որպես գրավ` բանկերը հողն ընդունեն։ Այս հարցում կհաջողեն, թե ոչ՝ վարչապետը դեռ վստահ չէ, բայց հիշեցրեց, որ կառավարությունը 11 ծրագրային վարկեր է առաջարկում, որոնցից ևս կարող են օգտվել։
«Ասի` գամ մի հատ մեր թագավորին տենամ, էթամ ջուր անեմ»,- անսպասելի վարկային զրույցն ընդհատեց գյուղացիներից մեկը։
Դրանից հետո վարչապետը շարունակեց շրջել գյուղի ծիրանի այգիներից մեկում և հիանալ այգու լավ բերքով։ Գյուղացիները նշեցին, որ ցավոք, նման լավ բերք բոլոր գյուղացիները չէ, որ ստացել են։ Մեկի բախտը բերել է, մյուսինը՝ ոչ։ Ցրտահարությունն իր գործն արել է։
Այստեղ վարչապետը զարմացավ՝ այս տարի ցրտահարություն է եղե՞լ, բա ինչու է այս այգում բերքը լավ, ուրեմն մի գյուղացին մի բան ճիշտ է անում, մյուսը՝ սխալ։
«Էս ծառն իմ այցի կապակցութամբ չի սարքվել, չէ՞, ցոգոլն իսկակա՞ն է»,- ասաց վարչապետը՝ ցույց տալով ծիրանի չհասունացած պտուղներով ծանրաբեռնված ծառի ճյուղը, հետո էլ կատակելով ավելացրեց՝ «Էս ծառի տերը վերևում հաստատ ծանոթ ունի»։
Գյուղատնտեսներից մեկը բացատրեց, որ բերքատվությունը մի շարք հանգամանքներով է բացատրվում, հնարավոր է՝ հիսուն մետր հեռավորության վրա այգիները լրիվ տարբեր բերքատվություն ունենան։ Գյուղացիներից մեկն էլ նշեց, որ իրենց սովորել է պետք, որ ավելի լավ և արդյունավետ այգիները մշակեն։
Դրանից վարչապետն ուրախացավ՝ նշելով, որ սա իսկական գյուղատնտեսական հեղափոխություն է, որովհետև առաջին անգամ գյուղացին նշում է, որ գիտելիք է պետք՝ հասկանալու համար, թե ինչու է մի ծառի վիճակը լավ, մյուսինը՝ վատ։ Նրա խոսքով՝ մեր գյուղատնտեսության ամենամեծ խնդիրը հենց դա է՝ ծագում են հարցեր, որոնց պատասխանը չենք իմացել, իսկ հիմա ցանկանում ենք սովորել։
«Թող Փաշինյանը խաբար լինի` մեր օրը օր չի». կորոնավիրուսը գյուղացիներին շվարած է թողել
