ԵՐԵՎԱՆ, 22 մայիսի– Sputnik, Կարինե Հարությունյան. Հեռավոր 2003–ին, երբ կառուցվում էր Վանաձորի պետական համալսարանի վարչական մասնաշենքը, նկուղային հարկում նաև շոգեբաղնիք է սարքվել։ Վանաձորի պետական համալսարանի նորընտիր ռեկտոր (մարտի 1-ին է ընտրվել) Ռուստամ Սահակյանը Sputnik Արմենիայի հետ զրույցում ասաց, որ շոգեբաղնիքում աշխատող հաստիք բուհում չի եղել, սակայն իրեն հայտնել են` այն գործող կառույց է եղել։
«Շոգեբաղնիքի գործունեության հարցը պետք է պարզաբանվի, և այդ ուղղությամբ զբաղվում են։ Նյութատեխնիկական խնդիրներ կան` ինչպե՞ս է այն հայտնվել այդտեղ և ի՞նչ իրավունքով։ Ես դեռևս որևէ տեղեկություն չունեմ դրա գործունեության, նպատակի մասին, միայն գիտեմ` այն կառուցվել է 17 տարի առաջ, երբ մասնաշենքն էր կառուցվում»,–ասաց Սահակյանը։
Նրա խոսքով` շոգեբաղնիքի գործունեության մասին իմացել է, երբ ռեկտոր նշանակվելուց հետո շրջել է բուհի մասնաշենքերում, նկուղներում։ Շենքում, որտեղ առկա է շոգեբաղնիքը, ռեկտորի, պրոռեկտորի, վարչական մասի աշխատողների աշխատասենյակներն են։ Ռեկտորը կառույցի գոյության հարցը բարձրացրել է օրերս կայացած հոգեբարձուների խորհրդի նիստի ժամանակ, որին ներկա է եղել նաև Լոռու մարզպետ Անդրեյ Ղուկասյանը։
Վանաձորի համալսարանի ամբիոնի վարիչը ձերբակալվել է. 8 ուսանողի մեղադրանք է առաջադրվել
Սահակյանը շոգեբաղնիքի գործունեությունը ոչ նպատակային է համարում, ասում է` իր պաշտոնավարման ժամանակ այն չպետք է գործի։Նրա խոսքով` այդ տարածքը պետք է օգտագործվի հօգուտ ուսանողի, ուստի կմտածեն այն վերակազմակերպելու վերաբերյալ։ Իսկ դրա գործունեության նպատակները և այլ հարցեր պարզելու համար, ըստ նրա, պետք է միջամտեն իրավապահները։
Վանաձորի պետական համալսարանի ռեկտորը պատմեց նաև, որ նկուղներից մեկում էլ հրաձգարան է կա, որը մտադիր են պահպանել։ Հրաձգարանում պարապում, մրցումներ են անում նաև ուսանողները ։ Բուհում հրաձգարանի մասնագետի դրույք էլ կա։
«Երկուշաբթի օրվանից բուհում ներքին աուդիտ կանցկացվի` ամենամյա աուդիտի մասին է խոսքը, որը սակայն, այս տարի մի փոքր ավելի խորքային կլինի։ Այս պահին մենք բուհի կառուցվածքային փոփոխություններով ենք զբաղված, ուզում մարզադահլիճի խնդիրը լուծել, այսինքն` մարզադահլիճ կառուցել։ Տարածքներ կան, մնում է` մնացած հարցերը լուծենք»,–ասաց Սահակյանը։
Բացի այդ, բուհը պատրաստվում է ընդունելության իրականացմանը։
Լոռու մարզպետարանի տեղեկատվության և հասարակայնության հետ կապերի բաժնի գլխավոր մասնագետ Աննա Գասպարյանը Sputnik Արմենիայի հետ զրույցում ասաց, որ մարզպետն այս պահին չի ցանկանում որևէ մեկնաբանություն տրամադրել կամ տեղեկացնել` արդյո՞ք իրավապահներին տեղյակ պահել են շոգեբաղնիքի գործունեության մասին։
Ի դեպ, բուհի` օրերս կայացած հոգաբարձուների խորհրդի նիստի ժամանակ ռեկտորը հոգաբարձուների խորհրդի անդամներին առաջարկել է գնալ ու սեփական աչքերով տեսնել շոգեբաղնիքը։
