ԵՐԵՎԱՆ, 20 մայիսի – Sputnik. «Արարատ 73»-ի վետերան Սերգեյ Պողոսյանը վստահեցնում է, որ չարագործները հարված են հասցրել ամբողջ ժողովրդին։
Այսօր հայտնի դարձավ, որ անհայտ անձինք գողացել են «Արարատ 73» թիմին նվիրված արձանախմբի մի քանի ֆուտբոլիստների արձանները։
«Սա հարված է ոչ միայն «Արարատ 73»–ի, այլև բոլոր երկրպագուների համար, նրանց համար, ովքեր ողջ են, և նրանց համար, ովքեր արդեն չկան, ամբողջ ազգի համար։ Ավելի սարսափելի բան լինել չի կարող», – Sputnik Արմենիային ասաց հայտնի կիսապաշտպանը։
Նրա խոսքով` շատ ցավալի է, որ նման բան է տեղի ունեցել։ Գողացել են գլխավոր մարզիչ Նիկիտա Սիմոնյանի, թիմի ղեկավար Ռոբերտ Ծաղիկյանի և մարզիչներ Օնիկ Աբրահամյանի ու Հարություն Քեհեյանի արձանները:
Սա, Պողոսյանի խոսքով, իսկական վանդալիզմ է։ Նրանք, ովքեր գնացել են այդ քայլին, որևէ սրբություն չունեն, չեն հավատում ո՛չ աստծուն, ո՛չ սատանային։
Նախկին ֆուտբոլիստի կարծիքով` հազիվ թե սա մեկ–երկու մարդու ձեռքի գործ լինի։ Առնվազն 3-4 մարդ է գործել։
«Այս նողկալի օպերացիան նրանք նախապես են մշակել։ Եվ ամենայն հավանականությամբ մեծ մեքենայով են եկել։ Նույնիսկ հետքերը կան։ Շատ ցավալի է», – ասաց Պողոսյանը։
Նրա խոսքով, հարցն այն չէ, որ ինքը հանդես է եկել «Արարատի» կազմում, որը չեմպիոն և գավաթի հաղթող դարձել։ Հարցն այն է, որ թիմին երկրպագում էր ամբողջ ազգը։
«Խաղացողները շատ էին սիրում ֆուտբոլը, հայրենիքը, այդ պատճառով էլ ամեն ինչ տալիս էին հայրենիքին... Մեզ մոտ նման հրաշալի ժամանակաշրջանէ եղել, և ժողովուրդը դրանով ապրում էր։ Իսկ սրանք ամեն ինչի վրա խաչ են քաշում», – նշեց Պողոսյանը։
Ըստ նրա` քաղաքապետարանը չի հետևում արձանախմբին, որի տարածքում ծաղիկներ ու եղևնիներ են եղել։ Քաղաքապետարանը խոստացել է հոգ տանել արձանի մասին` նշելով, որ դա «Կենտրոն» վարչական շրջանի պարտավորությունների մեջ է մտնում։ Պողոսյանը քաղաքային իշխանություններին խնդրել է նաև տեսախցիկներ տեղադրել։
1973 թվականը «Արարատի» և ընդհանուր առմամբ հայկական ֆուտբոլի պատմության ամենանշանակալի ժամանակաշրջանն էր։ Թիմը դարձավ ԽՍՀՄ չեմպիոն և գավաթակիր` եզրափակիչ խաղում 2:1 հաշվով առավելության հասնելով Կիևի «Դինամոյի» նկատմամբ։
«Արարատն» այս խաղի համար արժանացավ միանգամից 4 թիմային մրցանակի` «Ագրեսիվ հյուր», «Գրիգորի Ֆեդոտովի անվան», «Մրցանակ մեծ հաշվի համար» և խփած ու բաց թողած գնդակների լավագույն տարբերության համար: Ակումբի ութ ֆուտբոլիստներ ընդգրկվեցին ԽՍՀՄ առաջնության մրցաշրջանի «33 լավագույնների» ցանկում:
