ԵՐԵՎԱՆ, 18 մայիսի - Sputnik. Ադրբեջանի համար կարևոր է իմանալ` հայկական հետախուզությունն իմացե՞լ է, թե՞ ոչ ապրիլյան պատերազմը սկսելու մասին։ Լրագրողների հետ զրույցում նման կարծիք հայտնեց 2016 թվականի ապրիլյան իրադարձությունների ժամանակ Զինված ուժերի գլխավոր շտաբի հետախուզության վարչության պետի պաշտոնը զբաղեցրած Արշակ Կարապետյանը`ԱԺ ապրիլյան պատերազմի հանգամանքներն ուսումնասիրող քննիչ հանձնաժողովի նիստում հարցերին պատասխանելուց հետո։
Նա հրաժարվեց ասել, թե ինչ հարցեր են ուղղել իրեն։
«Ինձ վերաբերող բոլոր հարցերը մի քիչ գաղտնի են, և դրանց մասին խոսել չեմ կարող։ Ադրբեջանի համար կարևոր է իմանալ` հետախուզությունն իմացե՞լ է, թե՞ ոչ։ Երկու պատասխանն էլ շատ կարևոր է նրանց համար։ Եվ ես, չպատասխանելով ձեր հարցերին, ոչ թե ուզում եմ պաշտպանվել, այլ չեմ ուզում այդ ամենի մասին խոսել` շատ վտանգավոր է դա»,–ասաց Կարապետյանը։
Հարցին, թե ինչո՞ւ են երկրորդ անգամ հանձնաժողովի նիստին հրավիրել Կարապետյանին` վերջինս պատասխանեց՝ ճշտող հարցեր կային։
Կարապետյանը վստահեցրեց` պատասխանել է իրեն ուղղված բոլոր հարցերին, իսկ հանդիպումն անցել է կոռեկտ և աշխատանքային միջավայրում։ Նրա խոսքով` եթե տասն անգամ պետք լինի, տասն անգամ էլ կմասնակցի նիստին։
Նշենք, որ Կարապետյանը հիմա զբաղեցնում է ՀՀ վարչապետ Նիկոլ Փաշինյանի խորհրդականի պաշտոնը։
Հիշեցնենք, որ Կարապետյանն արդեն երկրորդ անգամ է մասնակցում հանձնաժողովի նիստին` նա դեռ 2019–ի հոկտեմբերի 17–ին պատասխանել էր հանձնաժողովի հարցերին։
«Իմ մասով էլ է բացթողում եղել». Մնացականյանն անկեղծացել է Ապրիլյան հանձնաժողովի նիստում
Արշակ Կարապետյանն ունի գեներալ-մայորի զինվորական կոչում, մարտական գործողությունների մասնակից է:
Ապրիլյան քառօրյա պատերազմից հետո՝ ապրիլի 26-ին ազատվել է Զինված ուժերի գլխավոր շտաբի հետախուզության վարչության պետի պաշտոնից։
Հանձնաժողովի վերջին` մայիսի 11-ի նիստին, մասնակցել էր ՀՀ նախկին վարչապետ Կարեն Կարապետյանը։ Հայտնի է, որ հանձնաժողով կհրավիրվի նաև ՀՀ արտաքին գործերի նախկին նախարար Էդվարդ Նալբանդյանը:
