ԵՐԵՎԱՆ, 16 մայիսի – Sputnik. Հայաստանն իր եվրոպացի գործընկերների հետ պայմանավորվածություն ունի, որ պետք է առաջ գնա ու սկսի ՀՀ–ԵՄ ազատ վիզային ռեժիմի շուրջ բանակցությունները։ Այսօր ընթացող առցանց ասուլիսի ժամանակ հայտարարեց վարչապետ Նիկոլ Փաշինյանը` պատասխանելով հարցին, թե ե՞րբ կսկսվեն ազատ վիզային ռեժիմի շուրջ դեռ 2018-ին նախատեսված բանակցությունները։
«Պետք է հասկանանք, որ այսօր ԵՄ–ում միգրացիան ամենասուր քաղաքական խնդիրն է, և ԵՄ–ում կան երկրներ, որտեղ ամենասուրն է այդ պրոբլեմը։ Մենք խնդիր ունենք` նախկինում վիզայի ազատականացման համաձայնագրերի արդյունքները շատ մեծ քաղաքական պրոբլեմներ են առաջացրել մի շարք եվրոպական երկրներում»,–ասաց Փաշինյանը` հավելելով, որ սա բավականին նուրբ թեմա է ԵՄ–ի համար։
Վարչապետի խոսքով` այստեղ Հայաստանը պետք է առաջ գնա քայլ–քայլ, մյուս կողմից Հայաստանը եվրոպական երկրներին ցույց է տվել, որ վերջին տարիներին ԵՄ երկրներից ապաստան հայցած քաղաքացիների թիվն ավելի քան 60 տոկոսով նվազել է։ Սա, Փաշինյանի գնահատմամբ, շատ լուրջ փաստարկ է, որ Հայաստանի հետ այդ բանակցությունները սկսեն։
Վարչապետը վստահեցրեց` այդ փաստարկն իրական կյանքում բանակցությունների մեկնարկի ձևով արտահայտելու պայմանավորվածություն կա, սակայն կորոնավիրուսի պատճառով, ինչպես նաև ԵՄ անդամ երկրների ներքին խնդիրներով պայմանավորված` անընդհատ ձգձգվում է վիզայի ազատականացման հարցը։
«Հույս ունենք, որ օր առաջ կսկսվեն այդ բանակցությունները»,–իր խոսքն ամփոփեց Փաշինյանը։
Հիշեցնենք, որ կորոնավիրուսի տարածման կանխարգելման նպատակով մի շարք երկրներ փակել են իրենց սահմաններն օտարերկրացիների համար։ Հայաստանում այդ առումով նույնպես սահմանափակումներ կան` Հայաստան կարող են վերադառնալ միայն ՀՀ քաղաքացիները։
Նշենք, որ դեռ նախորդ տարվա սեպտեմբերին ԱԳ նախարար Զոհրաբ Մնացականյանը հայտարարել էր, որ Եվրոպական երկրների հետ մուտքի վիզաների ազատականացման հարցը լուծելու համար Հայաստանն արդեն փորձագետների խումբ է ստեղծել։ Նախարարի խոսքով` Հայաստանը վիզաների ազատականացման համար աշխատում է տարբեր երկրների մայրաքաղաքների հետ երկխոսելով, որպեսզի նախ ի ցույց դնի մեր առաջնորդությունները և ապա լսի այլ երկրների մտահոգությունները։
