ԵՐԵՎԱՆ, 15 մայիսի- Sputnik. Վերին Լարսի անցակետում ռուսական կողմից ներկայում մոտ 35 ՀՀ քաղաքացիներ կան, որոնք ցանկություն են հայտնում վերադառնալ Հայաստան սեփական ավտոմեքենաներով:
Sputnik Արմենիայի հետ զրույցում Դոնի Ռոստովում ՀՀ գլխավոր հյուպատոսությունը հայտնեց, որ որպես լուծման տարբերակ` իրենց կողմից առաջարկվել է կազմակերպել ՀՀ քաղաքացիների վերադարձն առաջիկայում կայանալիք Սոչի-Երևան, Կրասնոդար-Երևան թռիչքներով՝ միաժամանակ հոգալով ինչպես կանանց և երեխաների ճանապարհածախսը, այնպես էլ ՀՀ քաղաքացիներին պատկանող ավտոմեքենաները հատուկ հատկացված կայանատեղիներում պահելու հարցերը:
«Անցակետում գտնվող ՀՀ քաղաքացիները հրաժարվել են լուծման վերոնշյալ, ներկայումս միակ տարբերակից՝ պնդելով կազմակերպել իրենց վերադարձը Հայաստան բացառապես իրենց անձնական օգտագործման մեքենաներով»,- տեղեկացնում են հյուպատոսությունից և հավելում, որ ՀՀ քաղաքացիները կարող են իրենց անձնական մեքենաներով ցամաքային ճանապարհով ՌԴ-ից Հայաստան վերադառնալ միայն Վրաստանի կառավարության՝ օտարերկրացիների մուտքը սահմանափակող որոշման չեղարկումից հետո:
Հյուպատոսությունից հիշեցնում են, որ նոր տիպի կորոնավիրուսի պատճառով վրացական իշխանությունների կողմից երկրում հայտարարված արտակարգ դրության պայմաններում ռուս-վրացական սահմանը շարունակում է փակ լինել օտարերկրյա քաղաքացիների համար:
ՀՀ քաղաքացիները Վերին Լարսի անցակետի մոտ շատացել են․ նրանք վերջնագիր են ներկայացրել
