ԵՐԵՎԱՆ, 15 մայիսի- Sputnik. Արցախի Հանրապետությունում կորոնավիրուսային հիվանդություն է հաստատվել ևս 4 քաղաքացու մոտ։ Արցախի տեղեկատվական շտաբը՝ հղում անելով ԱՀ առողջապահության նախարարությանը, Facebook-ի պաշտոնական էջում տեղեկացնում է, որ կորոնավիրուսի ախտորոշման նպատակով ՀՀ է ուղարկվել 57 փորձանմուշ, որոնցից առայժմ հայտնի են 27-ի պատասխանները։
«Նոր կորոնավիրուսի վարակը հաստատվել է 4 քաղաքացու մոտ, որոնք ավելի վաղ Շահումյանի շրջանում հաստատված վարակակրի՝ ինքնամեկուսացման մեջ գտնվող ընտանիքի անդամներ են»,- նշված է հաղորդագրության մեջ:
ԱՀ առողջապահության նախարարության հաղորդմամբ՝ հիվանդների վիճակը բավարար է։
Հիշեցնենք՝ Արցախում դեռ սպասում են ՀՀ ուղարկված ևս 30 փորձանմուշների հետազոտությունների պատասխաններին։
«Արցախում կորոնավիրուսի տարածման օջախները մարված են»․ ԱՀ պարետ
Վերջին տվյալներով՝ ԱՀ-ում հայտնաբերվել է կորոնավիրուսի 24 դեպք, որոնցից 8-ն առողջացել են։ Այս պահին Արցախում մեկուսացված է 62 քաղաքացի: Ընդհանուր կատարվել է 554 թեստավորում:
