Ալեքսանդր Խրոլենկո, ռազմական վերլուծաբան
Ռադիացիոն, քիմիական և կենսաբանական պաշտպանության (ՌՔԿՊ) մասնագետների և ռազմական բժիշկների համահավաք ջոկատը պատվով ավարտեց իր առաքելությունը COVID-19 կորոնավիրուսի եվրոպական էպիկենտրոնում և համաշխարհային մասշտաբի խնդրի լուծման գործում պրոֆեսիոնալ, օպերատիվ և արդյունավետ գործողությունների օրինակ ցույց տվեց:
Ռուսաստան վերադառնալուց հետո կորոնավիրուսային վարակի դեմ պայքարի «իտալական փորձը» ամենայն հավանականությամբ պահանջարկ կունենա։
Արդեն մերձմոսկովյան Չկալովսկի օդանավակայան են ժամանել իններորդ և տասներորդ Իլ-76 ռազմատրանսպորտային ինքնաթիռները՝ Ռուսաստանի «բժշկական հատուկ զորքերի» կազմին պատկանող մասնագետներով և տեխնիկայով, որոնք Իտալիայի Հանրապետության տարածքում օգնում էին պայքարել COVID-19-ի դեմ։ Նրանք կատարել են իրենց առաջադրանքը։
Ավելի վաղ Իտալիայի ժողովրդին անմիջական օգնություն ցուցաբերելու համար ՌԴ-ն Իտալիա էր ուղարկել 8 շարժական բրիգադ (մոտ 100 առաջատար ռազմական մասնագետներ՝ վարակաբաններ և բժիշկներ), ախտորոշիչ սարքավորումներ, տրանսպորտի և տարածքի աերոզոլային ախտահանման ավտոմոբիլային համալիրներ, Ռադիացիոն, քիմիական և կենսաբանական պաշտպանության զորքերի (РХБЗ) 15 լաբորատորիաներից մեկը, այլ բժշկական սարքավորումներ: Ռուսաստանի ՊՆ-ի ինքնաթիռներն օպերատիվ կերպով Հռոմից 30 կմ հեռու տեղակայված Pratica di Mare ավիաբազա են տեղափոխել գործուղված զինծառայողներին և աշխատանքի համար անհրաժեշտ բոլոր պարագաները:
Ռուս մասնագետներն Իտալիա մեկնեցին մարտի 23-ի գիշերը և մինչև մայիսի 7-ն ընկած ժամանակահատվածում մի շարք դժվարին և պատասխանատու գործողություններ իրականացրին. Լոմբարդիայի մարզի և Բրեշիայի նահանգի 100 բնակավայրերում ամբողջովին ախտահանեցին տարեցների համար նախատեսված մի քանի պանսիոնատներն ու համաճարակաբանական տեսանկյունից բարդ այլ օբյեկտները: Ընդհանուր առմամբ գործուղման ընթացքում ախտահանվեց 120 շենք և շինություն, 1 մլն 200 հազար քմ ներքին տարածք, ավելի քան 500 հազար քմ պինդ ծածկույթով ճանապարհ:
Բացի այդ, Բերգամո քաղաքում դաշտային հոսպիտալի աշխատանքի սկսվելուց հետո (ապրիլի 6-ից) ռուս զինվորական բժիշկները բուժման ընդունեցին կորոնավիրուսով վարակված 115, և կարճ ժամանակում 76 պացիենտ ապաքինվեց։
Հոսպիտալում ութ բրիգադ կար, ՌԴ Պաշտպանության նախարարության ավելի քան 32 բժշկական մասնագետներ շուրջօրյա ռեժիմով և երեք հերթափոխով ինտենսիվ թերապիայի և թեթև ու միջին ծանրության հիվանդների բուժման բաժանմունքներում հիվանդների ընդունելություն ու բուժում էին իրականացնում: Ռուսաստան վերադառնալուց հետո «բժշկական հատուկ ջոկատի» անդամները սանիտարական-համաճարակաբանական միջոցառումներ կանցնեն։ Այնուհետև նորից կնետվեն պայքարի, չէ՞ որ համավարակը դեռ չենք հաղթել։
Յոթշաբաթյա պայքար
Սա Իտալիայի և ամբողջ Եվրոպայի համար կորոնավիրուսի համավարակի դեմ պայքարում միջազգային համագործակցության հատկանշական, բովանդակալից և շատ կարևոր օրինակ էր։ ՌԴ նախագահ Վլադիմիր Պուտինը մարտի 23-ին Իտալիայի վարչապետ Ջուզեպպե Կոնտեի հետ զրույցում հաստատել էր կորոնավիրուսի դեմ պայքարում օգնելու պատրաստակամությունը։
Դրանից անմիջապես հետո Ռուսաստանը բառացիորեն երկու օրվա ընթացքում տասնհինգ Իլ-76 ինքնաթիռներով Իտալիա էր ուղարկել սակավաթիվ, խիստ պրոֆեսիոնալ և չափազանց արդյունավետ բժշկական կոլեկտիվին՝ զինված ամենաժամանակակից տեխնիկայով։ Հենց միայն կենսաբանական բնույթի արտակարգ իրավիճակներում պաթոգեն կենսաբանական նյութերի անալիզի համար նախատեսված «Սիչ» մոդուլային համալիրը հսկայական արժեք ունի:
Պատահական չէ, որ ռուսական ջոկատին դիմավորել էին անձամբ Իտալիայի արտգործնախարար Լուիջի դի Մայոն և Իտալիայի ԶՈւ գլխավոր շտաբի պետք Էնցո Վիչերելլին։ Ընդ որում՝ դի Մայոն հուզված հայտարարել էր, որ Իտալիայի պաշտպանության նախարարությունը լիովին նրանց տրամադրության տակ է։
Եվ այսպես կորոնավիրուսային վարակի բարձր տեխնոլոգիական ոչնչացումն ու ամենածանր հիվանդների բուժումը սկսելուց առաջ Մոսկվան փրկության հույս տվեց, իսկ ռուս զինծառայողները շատ եվրոպացիների մտքում հեղաշրջում կատարեցին։ Ակնառու օրինակը լավագույն ձևով է պատասխանում «արդյո՞ք ռուսներն ուզում են պատերազմ» հարցին և Ռուսաստանի իրական սկզբունքների, հնարավորությունների, միջոցների և նպատակների վկայություն է հանդիսանում (դա, իհարկե, ՆԱՏՕ-ի և Եվրամիության միջև պառակտում մտցնելու ձգտում չէ, ինչպես գրել էին Արևմուտքի առանձին լրատվամիջոցներ):
Դմիտրի Պեսկովն ասել է՝ որն է COVID-19-ի գլխավոր վտանգը
Հիշեցնեմ, որ Իտալիայում կորոնավիրուսից ավելի քան 31 հազար մարդ է մահացել (մահացությունը՝ 14%), Բերգամո քաղաքը մարտի կեսերին վերածվել էր «կորոնավիրուսային դժոխքի»․ տեղի դիակիզարանը չէր հասցնում աշխատանքի այդպիսի ծավալ կատարել։
Երկրում առողջապահության ոլորտի ավելի քան 4800 աշխատակից էր վարակվել՝ երկու անգամ ավելի շատ, քան Չինաստանում։ Եվ այդ պայմաններում ՌԴ պաշտպանության նախարարության շարասյունը 600 կիլոմետրանոց երթ իրականացրեց Հռոմից դեպի Բերգամո, և մասնագետներն իսկույն գործի անցան։ Նման օգնությունը դժվար է գերագնահատել։
Մայիսի 14-ի դրությամբ Իտալիայում COVID-19-ից բուժվել է 115 288 մարդ, հիվանդության ակտիվ փուլում դեռ 74 194 մարդ կա (շատ է, բայց կարող էր մի քանի անգամ ավելի շատ լինել): Նահանջող համաճարակի այս հուսադրող պատկերում կա նաև ՌԴ պաշտպանության նախարարության կարևոր ներդրումը։
COVID-19-ի դեմ ռուս մասնագետների յոթշաբաթյա անձնուրաց պայքարի օրինաչափ արդյունքը դարձավ իտալացի ժողովրդի երախտագիտությունը, Իտալիայի պաշտպանության նախարար Լորենցո Գուերինիի անկեղծ երախտագիտությունն ու պատասխան գործողություններ իրականացնելու պատրաստակամության մասին կարևոր հայտարարությունը (մայիսի 7-ին, ռուս գործընկերոջ՝ Սերգեյ Շոյգուի հետ հեռախոսազրույցում)։ Հնարավոր է, որ երկու երկրների ռազմաբժշկական համագործակցությունը համավարակից դուրս էլ կառուցողական շարունակություն կունենա։
Իրավիճակը Ռուսաստանում
Այո՛, Իտալիայում «հետախուզական պայքար» անցկացվեց։ Ռուսական ՌՔԿՊ պաշտպանության զորքերը Ապենինյան թերակղզի էին ուղարկել իրենց 15 լաբորատորիաներից միայն մեկը, 2065 միավոր մշակման հատուկ մեքենաներից 20-ը և հարյուրից էլ պակաս զինծառայող (ընդհանուր 20 հազարից)։ Այժմ ՌՔԿՊ ռազմաբժիշկներն ու մասնագետները ավելի լավ գիտեն, թե ինչպես է պետք պայքարել անտեսանելի հակառակորդի դեմ, ինչպես կազմակերպել կանխարգելիչ միջոցառումներն ու հիվանդների բուժումը։
Ռուսաստանում դեռ համաճարակաբանական բարդ իրավիճակ է։ Մայիսի 2-ից ի վեր առաջին անգամ այսօր մեկ օրում 10 հազարից պակաս վարակման դեպք է հայտնաբերվել։ Եվ այնուամենայնիվ, վարակման ընդհանուր վիճակագրությունը (ավելի քան 252 հազար մարդ) Ռուսաստանին «ապահովում է» երրորդ տեղը աշխարհում՝ ԱՄՆ-ից և Իսպանիայից հետո։ Առջևում հսկայական աշխատանք կա։
Ռազմաբժշկական կառույցներից բացի` ՌԴ տարածքում յուրաքանչյուր ռազմական շրջանում ՌՔԿՊ պաշտպանության զորքերի առանձին բրիգադ է գտնվում, համազորային բանակի կազմում ՌՔԿՊ հաստիքային գունդ կա։ Դրանց հիման վրա ապրիլից շարժական ջոկատներ են ձևավորվում, որոնք անհրաժեշտության դեպքում օպերատիվ կերպով արդյունաբերական ձեռնարկությունների, բուժհաստատությունների և կենսական նշանակության այլ օբյեկտների հատուկ մշակում կիրականացնեն։
Պահպանելով երկրի զորահավաքային մեխանիզմները ՝ ՌՔԿՊ-ի մասնագետները ապահովում են նաև գարնանային զորակոչի անվտանգությունը։ Կանխարգելիչ միջոցառումներ են իրականացվում յուրաքանչյուր տարածաշրջանում և զորակոչի բոլոր փուլերում։
Միշուստինն ապաքինվում է, դուրս կգրվի հաջորդ շաբաթ. ՌԴ առողջապահության նախարար
Բացի այդ, ՌԴ ՊՆ մասնագետները խոստացել են մինչև մայիսի 15-ը շահագործման հանձնել ևս ութ բազմաֆունկցիոնալ բժշկական կենտրոն․ այդպիսով գերատեսչությունը կկատարի երկրի 15 շրջաններում 16 բազմապրոֆիլ բժշկական կենտրոնների կառուցման պետական առաջադրանքը:
Հնարավոր է, որ այդ քանակությամբ բժշկական կենտրոնների կարիք չլինի, և մի քանիսը պահեստային մնան, բայց համավարակի դեմ օպերատիվ պայքարի այս փորձը ևս շատ կարևոր է։ Ո՞վ գիտե, թե առջևում ինչ նոր վիրուսներ են մեզ սպասում։
Ինչպես են ռուսաստանցիներին օգնելու դուրս գալ կարանտինից. Պուտինի ուղերձի առանցքային կետերը
