ԵՐԵՎԱՆ, 14 մայիսի –Sputnik. SWAN անունը կրող նոր գիսաստղը բավականին մոտեցել է Երկրին։ Այն գտնվում է Երկրից 84 մլն կմ հեռավորության վրա։ Երկնային մարմինը հնարավոր է տեսնել անզեն աչքով՝ հարավային կիսագնդում։ Տեղեկությունը հայտնում է The New York Times–ը։
Մայիսի վերջին, աստղագետների սպասումների համաձայն, SWAN–ը կմոտենա Արևին։ Ենթադրվում է, որ վերջնական մասերի բաժանվելուց առաջ այն դարձյալ կպայթի։
C/2020 F8 (SWAN) գիսաստղը աստղագետները բացահայտել են ապրիլի 11-ին։ Գիտնականների ուշադրությունը գրավել էր արևային քամին չափող SWAN (Solar Wind ANisotropies instrument) սարքով մարտի 25-ին արված լուսանկարները։ Սարքը տեղադրված է «SOHO» տիեզերանավում։
Աստղագետները լուսանկարի վրա կանաչ պոչով նոր երկնային մարմին էին հայտնաբերել։ Պարզվել էր՝ օբյեկտը գիստաստղ է։
Լուսնի վրա օգտակար հանածոներ արդյունահանել, կամ գերլիալուսինը ազդել է Թրամփի վրա
«SOHO» տիեզերական սարքը գործարկվել է 1995 թվականին Արևի և արևային քամու ուսումնասիրության համար։ Նրա լուսանկարների շնորհիվ ավելի քան 3 հազար գիսաստղ է բացահայտվել։
