ԵՐԵՎԱՆ, 13 մայիսի – Sputnik. Կորոնավիրուսի ախտորոշման ՊՇՌ (պոլիմերացված շղթայական ռեակցիա) հետազոտություններն արդեն իրականացվում են նաև Շիրակի մարզում՝ Հիվանդությունների վերահսկման և կանխարգելման ազգային կենտրոնի Շիրակի մասնաճյուղում։ Լաբորատոր սարքավորումներն արդեն Գյումրիում են։
«Երեկվանից մենք այդ հետազոտությունն իրականացնում ենք Գյումրիում, ինչը մեծ առավելություն է, քանի որ պատասխաններին երկար սպասելու խնդիր չենք ունենա: Մինչև այս նմուշառումներն իրականացվում էին երևանյան լաբորատորիաներում, իսկ վերջին շրջանում` նաև Լոռու»,- Sputnik Արմենիային ասաց Շիրակի մարզպետարանի առողջապահության ու սոցիալական ապահովության վարչության պետի ժամանակավոր պաշտոնակատար Լեյլի Ասլանյանը` տեղեկացնելով, որ արդեն 33 հետազոտություն է իրականացվել Շիրակի մարզում:
1 փուլով տվյալ սարքավորումն իրականացնում է 34 հետազոտություն, որոնց պատասխանները պատրաստ են լինում 6 ժամ անց:
«Օրվա ընթացքում միջինը կարող ենք իրականացնել 60 ՊՇՌ հետազոտություն»,- ասաց Ասլանյանը։
![«Պատասխանին երկար սպասելու խնդիր չենք ունենա». Գյումրիում էլ են կորոնավիրուս ախտորոշում «Պատասխանին երկար սպասելու խնդիր չենք ունենա». Գյումրիում էլ են կորոնավիրուս ախտորոշում - Sputnik Արմենիա](https://cdn.am.sputniknews.ru/img/2303/56/23035683_0:0:1600:1200_600x0_80_0_0_e078daa2f917df55c1a2e1b94b0ddceb.jpg)
Մինչ սարքավորումները Գյումրի բերելը տեղի մասնագետները վերապատրաստվել են Երևանում։
Հետազոտությունն իրականացվում է այն անձանց շրջանում, որոնց կարանտինային ժամանակը լրացել է, և նորից պետք է նմուշառում իրականացվի, խոսքը վերաբերում է Գյումրու ինֆեկցիոն հիվանդանոցում բուժվող կամ տնային մեկուսացման մեջ գտնվող պացիենտներին։ Sputnik Արմենիայի հարցին, թե ցանկության դեպքում յուրաքանչյուր անձ կարո՞ղ է ՊՇՌ հետազոտություն անցնել, Ասլանյանը պատասխանեց` նմանատիպ վճարովի կլինիկաներ կան Երևանում, բայց մարզում չկան:
![Կորոնավիրուսի ախտորոշման ՊՇՌ (պոլիմերացված շղթայական ռեակցիա) հետազոտությունների լաբորատորիա Կորոնավիրուսի ախտորոշման ՊՇՌ (պոլիմերացված շղթայական ռեակցիա) հետազոտությունների լաբորատորիա - Sputnik Արմենիա](https://cdn.am.sputniknews.ru/img/2303/59/23035934_0:62:1600:1067_600x0_80_0_0_affd071ea92b43fb94381b90d779863c.jpg)
![Կորոնավիրուսի ախտորոշման ՊՇՌ (պոլիմերացված շղթայական ռեակցիա) հետազոտությունների լաբորատորիա Կորոնավիրուսի ախտորոշման ՊՇՌ (պոլիմերացված շղթայական ռեակցիա) հետազոտությունների լաբորատորիա - Sputnik Արմենիա](https://cdn.am.sputniknews.ru/img/2303/59/23035939_0:60:1600:1066_600x0_80_0_0_75155c43d644fd4bda13ad931cb62fda.jpg)
Գյումրու ինֆեկցիոն հիվանդանոցում մայիսի 13-ի դրությամբ կորոնավիրուսով վարակված 70 մարդ է բուժում ստանում, նրանցից 58-ը Շիրակի մարզի բնակիչներ են։ 25 մարդ էլ բուժվում է Երևանում։ Մարզում կորոնավիրուսից մահանալու 6 դեպք է արձանագրվել: Հիվանդության անախտանիշ ունեցող 58 մարդ տեղափոխվել են Ծաղկաձորի հյուրանոցներ։ Շիրակի մարզում այս պահին մեկուսացման և ինքնամեկուսացման ցուցում ունի 276 քաղաքացի։
Այսօրվա տվյալներով` Հայաստանում կորոնավիրուսով վարակվածների թիվը հասել է 3718–ի։