ԵՐԵՎԱՆ, 12 մայիսի - Sputnik. Մայիսի 2֊ին և 9֊ին կայացել է Լոս Անջելես֊Ամստերդամ֊Մինսկ֊Երևան չվերթը, որով ընդհանուր առմամբ Հայաստան են տեղափոխվել 35 քաղաքացի։ Տեղեկությունը հայտնում է Լոս Անջելեսում ՀՀ գլխավոր հյուպատոսության։
«Կալիֆորնիայից մայիսի 2֊ին Հայաստան վերադարձան ՀՀ 13 քաղաքացի, իսկ մայիսի 9֊ին՝ ՀՀ 22 քաղաքացի։ Լոս Անջելեսում ՀՀ գլխավոր հյուպատոսությունը, Նիդերլանդների Թագավորությունում ՀՀ դեսպանության հետ համագործակցությամբ, լոգիստիկ օժանդակություն ցուցաբերեց Հայաստան վերադարձող ՀՀ քաղաքացիներին՝ լուծելով, մասնավորապես, նրանց ուղեբեռի և Շենգենյան մուտքի արտոնագրերի հարցը»,- նշված է տարածած հաղորդագրության մեջ։
Նշվում է, որ ՀՀ գլխավոր հյուպատոսության դիվանագետները ներկա են եղել Լոս Անջելեսի օդանավակայանում՝ ՀՀ քաղաքացիների Հայաստան վերադարձի գործընթացին և կազմակերպել են մեր հայրենակիցների անխափան թռիչքը։
Նույն երթուղով չվերթներ տեղի են ունենում շաբաթական մեկ անգամ։ Առաջիկա չվերթը նախատեսվում է ս.թ. մայիսի 18֊ին։
Ղազախստանից Հայաստան է վերադառնում 35 ՀՀ քաղաքացի. ԱԳՆ
Ավելի վաղ Լոս Անջելեսում ՀՀ գլխավոր հյուպատոսությունը հայտնել էր, որ կորոնավիրուսի համավարակի հետ կապված` չվերթերի չեղարկման պատճառով, ԱՄՆ արևմտյան նահանգներում և հատկապես Հարավային Կալիֆորնիայում ՀՀ բազմաթիվ քաղաքացիներ են մնացել, որոնց մի մասն անհապաղ օգնության կարիք ունի։
