ԵՐԵՎԱՆ, 11 մայիսի – Sputnik. ՀՀ նախկին վարչապետ Կարեն Կարապետյանն այսօր լրագրողների հետ զրույցում հրաժարվեց նշել` 2018–ի ապրիլի 22-ին ինչ է խոսել ՀՀ վարչապետ Նիկոլ Փաշինյանի հետ։
«Փաշինյանի հետ ինչ պայմանավորել ենք, մեր ներքին պայմանավորվածությունն է։ Այդ պայմանավորվածությունը չի խախտվել»,–ասաց Կարապետյանը։
Ճշտող հարցին, թե արդյո՞ք Փաշինյանը խախտել է իրեն պայմանավորվածությունը, Կարապետյանը ևս մեկ անգամ շեշտեց` ոչ։
Նախկին վարչապետը հիշեցրեց, որ այդ ժամանակ միջնորդել էր դատախազին ՀՀ ԱԺ ձերբակալված պատգամավորներին պատգամավորական անձեռնմխելիությունից զրկելու վերաբերյալ միջնորդությունը հետ վերցնելու համար, որպեսզի ստեղծված իրավիճակից դուրս գան։
Նշենք, որ Կարապետյանն այսօր մասնակցում էր ապրիլյան պատերազմի հանգամանքներն ուսումնասիրող քննիչ հանձնաժողովի նիստին։
«Պատասխանել եմ բոլոր հարցերին». Կարապետյանը դուրս եկավ քննիչ հանձնաժողովի նիստից
Հիշեցնենք, որ 2018-ի ապրիլի 22-ին` հեղափոխության օրերին, բերման էին ենթարկվել ու ձերբակալվել ԱԺ պատգամավորներ Նիկոլ Փաշինյանը, Արարատ Միրզոյանը և Սասուն Միքայելյանը։ ԱԺ պատգամավորներին այդ կարգավիճակում պահելու առավելագույն ժամկետը 72 ժամ է, որից հետո նրանք կա՛մ պետք է ազատ արձակվեին, կա՛մ կալանավորվեին։ Իսկ կալանքի համար ՀՀ գլխավոր դատախազը պետք է միջնորդություն ներկայացներ ԱԺ, և ձայների մեծամասնությամբ պատգամավորներին զրկեն անձեռնմխելիությունից։ ՀՀ գլխավոր դատախազն ԱԺ ձերբակալված պատգամավորներին պատգամավորական անձեռնմխելիությունից զրկելու վերաբերյալ միջնորդություններ պատրաստել, սակայն Կարեն Կարապետյանի` դատախազի հետ զրույցից և միջնորդությունից հետո պատգամավորներին ազատ արձակեցին։
