ԵՐԵՎԱՆ, 8 մայիսի – Sputnik. ՀՀ երկրորդ նախագահ Ռոբերտ Քոչարյանն այսօր Երևանի ընդհանուր իրավասության դատարանում ընթացող դատական նիստում հայտնեց, որ ՔԿՀ–ի խցում մենակ է մնում իր ցանկությամբ, սակայն ապահովագրված չէ կորոնավիրուսով վարակվելուց։
«ՔԿՀ–ի աշխատողների 80 տոկոսը մեկ օր աշխատում, 3 օր ազատ է լինում, և ոչ ոք չի կարող վերահսկել ազատ օրերին նրանց տեղաշարժը։ Նրանց 90 տոկոսը երիտասարդ են, ինչը նշանակում է, որ կորոնավիրուսով վարակվելու դեպքում կարող է հիվանդությունը նաև առանց ախտանշանների ընթանալ»,–ասաց Քոչարյանը։
Ըստ ՀՀ երկրորդ նախագահի` ինքը մեկ շաբաթվա ընթացքում շուրջ 70 մարդու հետ է շփում ունենում։ Քոչարյանը նշեց` ՔԿՀ անձնակազմը փորձում է պահել կարանտինային պայմանները, սակայն շենքային պայմանները համապատասխան չեն կորոնավիրուսի դեմ պայքարի համար անհրաժեշտ պայմաններին։
Երկրորդ նախագահը հայտնեց նաև, որ իր ուտելիքն էլ դրսից ինչ–որ կազմակերպություն է մատակարարում, որը նույնպես չի վերահսկվում։
«Ոնց որ հանրակացարանում ապրեմ։ Եթե սա նորմալ է, ուրեմն թող այսպես մնա, ի՞նչ ասեմ»,–ասաց Քոչարյանը։
Այսօր դատարանում Քոչարյանի խափանման միջոց կալանքը փոխելու միջնորդություններ ներկայացվեցին։ ՀՀ նախկին վարչապետներ Վազգեն Մանուկյանը, Խոսրով Հարությունյանը և Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը հանդես եկան Քոչարյանի խափանման միջոց կալանքը անձնական երաշխավորությամբ փոխարինելու առաջարկով։
Նրա պաշտպան Հայկ Ալումյանն էլ Քոչարյանի խափանման միջոցը վերացնելու կամ կալանքի փոխարեն գրավ կիրառելու միջնորդություն ներկայացրեց։
Հիշեցնենք՝ Ռոբերտ Քոչարյանին մեղադրանք է առաջադրվել 2008 թ–ի մարտի 1-ի բողոքի ակցիաները ցրելու ժամանակ սահմանադրական կարգը տապալելու համար։ Նա իրեն ուղղված մեղադրանքները քաղաքական հետապնդում է համարում։ 2018թ-ին Քոչարյանին երկու անգամ ձերբակալեցին: 2019 թվականի հունիսի վերջին նա ձերբակալվեց երրորդ անգամ: Երկրորդ նախագահին նաև կաշառք ստանալու մեղադրանք է առաջադրված։
Ռոբերտ Քոչարյանն ապրիլի 28-ին քննչական մեկուսարանից տեղափոխվել էր Երևանի «Իզմիրլյան» բժշկական կենտրոն: Լուրեր էին շրջանառվում, որ նա չի ներկայանա այսօրվա դատական նիստին, քանի որ պետք է վիրահատվի։ Սակայն երեկ նրա որդին` Լևոն Քոչարյանը, հայտարարել էր, որ հայրը կներկայանա դատական նիստին։
Պաշտպանը բողոքում է. ՄԻՊ-ը չի արձագանքում Քոչարյանի իրավունքների խախտումներին
