ԵՐԵՎԱՆ, 8 մայիսի — Sputnik. ՀՀ վարչապետ Նիկոլ Փաշինյանն այսօր ԱԺ ամբիոնից դատապարտեց ԱԺ-ում տեղի ունեցած միջադեպը՝ նշելով, որ բռնության ցանկացած երևույթ՝ իր բոլոր դրսևորումներով անընդունելի է:
«Բռնությունը լինում է ոչ միայն ֆիզիկական, այլև բարոյական, հոգեբանական, և պետք է շատ ուղիղ ընդգծել, որ արդեն երկու տարի հեղափոխական թիմը, այդ թվում՝ այս խորհրդարանական մեծամասնությունն ու այս կառավարությունը հետևողականորեն և շարունակաբար ենթարկվում են բարոյական և հոգեբանական բռնությունների: Ներողություն եմ խնդրում ասելու համար, բայց խորհրդարանական մեծամասնության կին պատգամավորներին սոցիալական ցանցերում սպառնում են բռնաբարել, նրանց երեխաներին սպառնում են փողոցներում սաստկացնել, ամենավերջին ստահոդ, քստմնելի տեղեկություններն են տարածում ԱԺ «Իմ քայլը» խմբակցությունը ներկայացնող պատգամավորների վերաբերյալ»,- ասաց Փաշինյանը:
Նրա եզրակացությամբ` այս ամենը նպատակ է հետապնդում խեղճացնել, քայքայել քաղաքական մեծամասնությունն ու ժողովրդի ու քաղաքական մեծամասնության միջև առկա վստահությունը:
Փաշինյանը հայտարարեց, որ երեկ «Լուսավոր Հայաստանի» ղեկավարն իրեն հրավիրել է սուրճ խմելու, և ինքն ընդունել է հրավերը:
«Ես՝ ինքս իջել եմ իմ նախկին աշխատասենյակը, որտեղ այժմ պարոն Մարուքյանն է նստում ու ես ուղիղ ասել եմ, որ՝ այո, մենք բոլորս ունենք հիմքեր կասկածելու, որ դուք և ձեր գործունեությունն այդ ողջ հոգեբանական, բարոյական բռնություններ, և, ի վերջո՝ ֆիզիկական բռնություններ գործարկելու պլանի մի անբաժան մասն են» ,- ասաց Փաշինյանը՝ հավելելով, որ այսօր դիտելով առավոտյան տեղի ունեցած միջադեպի տեսագրությունը, և հիշեցնելով, որ միջադեպը տեղի է ունեցել ոչ թե ամբիոնի մոտ այլ դահլիճի սրահում, ուզում է հարց հնչեցնել. «Իսկ ի՞նչ գործ ուներ ելույթ ունեցողը այնտեղ»:
«Իմ քայլը» խմբակցության դռնփակ նիստում մանդատը վայր դնելու հարց չի քննարկվել․ ԱԺ փոխխոսնակ
«Երբ ամբիոնից իջնում էր ու մեծ արագությամբ ընթանում էր դեպի Սասուն Միքայելյանը, ինչի՞ համար էր գնում: Քաղաքական երկխոսություն ծավալելու՞: Կամ եթե նույնիսկ Սասուն Միքայելյանը տեղից վեր էր կացել, եթե նույնիսկ շարժվել էր, որտեղի՞ց վստահությունը, որ նա ուղղակի վրդովմունքը իր ձևով արտահայտելով դուրս չէր գալու այդ դահլիճից: Տեղի ունեցածը այլ կերպ, քան քստմնելի սադրանք, ես չեմ կարող անվանել, մանավանդ այդ տեսագրությունը մի քանի անգամ դիտելուց հետո: Բայց ես ուզում եմ դատապարտել նաև այն, որ մենք տրվում ենք սադրանքնեերի: Իմ եղբորը, իմ ընկերոջը ես դատապարտում եմ, որովհետև մենք իրավունք չունենք տրվել սադրանքների»,- ասաց Փաշինյանը՝ տեղի ունեցածը կոչելով իր ու իր քաղաքական թիմի ամենամեծ պարտությունը հեղափոխությունից հետո:
Նիկոլ Փաշինյանն իր ելույթում նաև հիշեցրեց, որ սադրանքը ՀՀ քրեական օրենսգրքով նախատեսված արարք է:
Նա նաև հայտարարեց, որ այս կերպ իրենց ցանկանում են հավասարեցնել «պադեզդներում մարդ ծեծողների, քիլերների», փորձում են շեղել իրենց արժեքներից ու հանել հունից:
«Ամեն օր իշխանությունը դառնում է բռնության զոհ՝ սերժական, քոչարյանական հանցավոր բանդայի և նրանց խորհրդարանական բանսարկուների կողմից»,- ասաց նա:
Նշենք, որ վարչապետի ելույթի պահին «Լուսավոր Հայաստանը» ԱԺ նիստերի դահլիճում չէր: Մինչ այդ խմբակցությունն արդեն լքել էր նիստերի դահլիճը՝ հայտարարելով, որ քաղաքական հետևանքներից ու եզրահանգումներից կախված կորոշի իր ապագա անելիքները խորհրդարանում:
ԱԺ-ում հնչող խոսքն ու պահվածքը օրինակ են դառնում նաև հասարակության համար. ՄԻՊ
Հիշեցնենք՝ ԱԺ այսօրվա նիստում ծեծկռտուք է տեղի ունեցել «Լուսավոր Հայաստան» խմբակցության ղեկավար Էդմոն Մարուքյանի և «Իմ քայլի» պատգամավոր Սասուն Միքայելյանի միջև։
Վեճին խառնվել են նաև դահլիճում գտնվող կառավարության անդամներն ու փոխվարչապետ Տիգրան Ավինյանը:
