ԵՐԵՎԱՆ, 8 մայիսի — Sputnik. Ադրբեջանի նախագահը հերթական անգամ փորձ արեց Երկրորդ համաշխարհային պատերազմում նացիզմի դեմ տարված հաղթանակի 75-ամյակը ծառայեցնելու հայ ժողովրդի հանդեպ տասնամյակներ վարվող իր թշնամական քարոզչությանը: Նման կարծիք է հայտնել ԱԳՆ մամուլի խոսնակ Աննա Նաղդալյանը` անդրադառնալով Ադրբեջանի նախագահի՝ «ՏԱՍՍ» լրատվական գործակալությանը հարցազրույցում Հայաստանի վերաբերյալ մեկնաբանություններին։
Ալիևն իր հարցազրույցում հերթական անգամ մեղադրել էր Հայաստանին նացիզմի հետևորդներին հերոսացնելու մեջ և այդ համատեքստում կրկին հիշել էր հերոս Գարեգին Նժդեհին։
«Հայրենական մեծ պատերազմի 75-ամյակը լավ առիթ է վերհիշելու և հարգանքի տուրք մատուցելու համաշխարհային չարիքի դեմ պայքարի ելած և հաղթանակած բոլոր ժողովուրդների զոհողությանը և միասնությանը: Համոզված ենք, որ պատմական հիշողությունը մարդկային արժանապատվության կարևորագույն արժեքն է։ Այդ պատմական հիշողության կեղծումը և այն նեղ քաղաքական շահերին ծառայեցնելու փորձերը վկայում են, որ դրանց հեղինակները չունեն ոչ պատմություն, ոչ արժանապատվություն և ոչ էլ հիշողության զգացում»,–ասել է Նաղդալյանը։
Նրա խոսքով` հայ ժողովրդի ներդրումը երկրորդ համաշխարհային պատերազմում դաշնակիցների հաղթանակի գործում ոսկե տառերով է գրված համաշխարհային պատմության էջերին:Նաղդալյանն ասել է նաև, որ հպարտությամբ ենք հիշում բոլոր հերոս հայորդիների անունները թե՛ Կարմիր բանակի և նրա ազգային դիվիզիաների, թե՛ հակահիտլերյան կոալիցիայի անդամ երկրների բանակներում, թե՛ դիմադրության շարժման և թե՛ հետախուզության շարքերում:
«Չի լինելու այնպես, որ ինչ-որ ուժեր մեզ վախեցնեն». Փաշինյանը՝ արցախյան խնդրի մասին
ԱԳՆ խոսնակը հիշեցրել է, որ այսօր ՀՀ տարածքում պետության պահպանության և խնամքի ներքո գտնվում են Հայրենական մեծ պատերազմի մասնակիցների շուրջ 600 հուշարձաններ: Հենց վերջիններս են հանդիսանում մեր միասնական հաղթանակի պատմության անխոս վկաները:
«Ադրբեջանի ղեկավարությանը պարզապես հարց եմ ցանկանում ուղղել, որի պատասխանը բոլորիս կողմից ակնկալվում է գործով. արդյոք ե՞րբ է վերականգնվելու Չարդախլու բնակավայրում Հայրենական մեծ պատերազմի հերոսների, այդ թվում, խորհրդային մարշալներ Հովհաննես Բաղրամյանին և Համազասպ Բաբաջանյանին նվիրված հուշարձանները, որոնք ավերվել են Ադրբեջանի Հանրապետության շրջանում»,–գրել է Նաղդալյանը։
Պատերազմն այլևս անսպասելի չէ՞․ ինչ դասեր ենք քաղել 2016թ-ից
Նա նշել է, որ դատապարտում է հուշարձանների հանդեպ բոլոր ոտնձգությունները ոչ միայն խոսքով, այլև այն իրողությամբ, որ Հայաստանի պատմության ընթացքում երկրորդ համաշխարհային պատերազմի մարտիկներին նվիրված որևէ հուշարձան չի ենթարկվել ոտնձգության:
