ԵՐԵՎԱՆ, 7 մայիսի — Sputnik. ՀՀ Քննչական կոմիտեն հայտնում է, որ հարուցված քրեական գործի արդյունքում հայտնաբերվել և առգրավվել են Մարտիրոս Սարյանի «Հայաստան» գեղանկարի էսքիզն ու Հովհաննես Զարդարյանի վրձնին պատկանող «Վերածնունդ» եռանկարը:
Մշակութային եզակի արժեքների՝ Սարյանի 60 մլն դրամ արժեքով և Զարդարյանի՝ 2 մլն դրամ արժեքով նկարների անհետացման փաստը հաստատվել էր 2018-2019թթ. ընթացքում «Ցուցահանդեսային կենտրոն» ՊՈԱԿ-ի ֆոնդերում կատարված ստուգումների ընթացքում:
2019թ. ապրիլի 3-ին հարուցվել էր քրեական գործ՝ ՀՀ քրեական օրենսգրքի 177-րդ հոդվածի (գողություն) 3-րդ մասի 1-ին կետի, 180-րդ հոդվածի (առանձնակի արժեք ունեցող առարկաներ հափշտակելը) 1-ին մասի և 315-րդ հոդվածի (պաշտոնեական անփութությունը) 2-րդ մասի հատկանիշներով, որի նախաքննությունն իրականացվում է ՀՀ քննչական կոմիտեի հատկապես կարևոր գործերի քննության գլխավոր վարչությունում:
Իրականացված քննչական և դատավարական գործողությունների արդյունքում տեղեկություններ են ստացվել, որ Մ.Սարյանի «Հայաստան» գեղանկարը և Հ. Զարդարյանի «Վերածնունդ» եռանկարի կենտրոնական մասը հնարավոր է գտնվեն ֆոնդապահոցներից մեկում: 2020թ. մայիսի 7-ին կատարված քննչական գործողության արդյունքում արժեքավոր գործերը հայտնաբերվել և առգրավվել են:
Տրետյակովյան պատկերասրահը Եղիշե Թադևոսյանի դիմանկարը հանձնել է Գրոզնու թանգարանին
Սրանով, սակայն, քրեական գործի նախաքննությունը չի ավարտվում: Բանն այն է, որ հեղափոխությունից հետո ՀՀ մշակույթի նախարարության նախաձեռնությամբ իրականացված մշակութային արժեքների ֆոնդերի ստուգման արդյունքում պարզվել էր 121.380.000 ՀՀ դրամ ընդհանուր արժեքով մի շարք մշակութային արժեքների՝ գեղանկարների, գոբելենների, գրաֆիկական աշխատանքների, քանդակների անհետացման մասին:
