ԵՐԵՎԱՆ, 7 մայիսի – Sputnik. Հայաստանը նոր միջոցներ կներգրավի Մեծամորի ատոմակայանի հիմնանորոգման համար։ Տեղեկությունը հայտնեց տարածքային կառավարման և ենթակառուցվածքների նախարար Սուրեն Պապիկյանը՝ 2019 թվականի բյուջեի կատարման մասին հաշվետվության ընթացքում։
«Այժմ նախատեսում ենք փոխել ֆինանսավորման ձևաչափը։ Հայաստանը ճիշտ է համարում ֆինանսական նոր միջոցների ներգրավումը և բանակցում է գործընկերների հետ` նախկինում ունեցած համաձայնագիրը, որն ավարտվել էր, չերկարացնելու շուրջ (պետք է նշել, որ 2019 թվականի դեկտեմբերին պայմանավորվածություն է ձեռք բերվել, որ վարկային վճարումները մեկ տարի ուշ են սկսվելու՝ 2021 թվականից, ըստ ամենայնի՝ հայկական կողմը մտափոխվել է․ - խմբ), - ասաց Պապիկյանը։
Վերանորոգման աշխատանքներն իրականացվում են Ռուսաստանի կառավարության տրամադրած մինչև 270 միլիոն դոլար վարկային գծով (15 տարի ժամկետով): Ավելի վաղ նախատեսված էր վճարումները սկսել 2020 թվականից, հետո այդ ժամկետը մեկ տարով հետաձգվել էր։ Սակայն այժմ էլ, կորոնավիրուսի տարածման պատճառով վտանգ կա, որ աշխատանքները կհետաձգվեն (դեռ հայտնի չէ, արդյո՞ք ռուս մասնագետները կկարողանան ժամանել)։
Ինչպես է Հայաստանի ատոմակայանն աշխատում արտակարգ դրության պայմաններում
Նախարարի դիտարկմամբ՝ երբ վարկի վճարման ժամկետը գա, հնարավոր է, որ շինարարական աշխատանքներն ամբողջովին ավարտված չլինեն։
Այնուամենայնիվ, Հայաստանը պատրաստվում է այլ գործընկերներից էլ նոր վարկեր ներգրավել կայանի վերանորոգման համար։ Մեր երկիրը բավարար չափով չօգտագործված վարկային միջոցներ ունի։ Պապիկյանի խոսքով՝ դրանք կարող են ուղղվել նաև Ատոմակայանի վերազինմանը։
Ապրիլի վերջին հայտնի դարձավ, որ ատոմակայանի ու Երևանի ՋԷԿ-ի վերանորոգման աշխատանքները հետաձգվել են կորոնավիրուսի հետ կապված աշխատանքների պատճառով։
