ԵՐԵՎԱՆ, 6 մայիսի - Sputnik. Մարտի 20–ից մինչև ապրիլի 6-ը Առողջապահական և աշխատանքի տեսչական մարմինը (ԱԱՏՄ) 2869 կազմակերպություններում և մասնաճյուղերում մշտադիտարկումներ է իրականացրել, որոնց արդյունքում նաև խախտումներ թույլ տված տնտեսվարողներ են հայտնաբերվել։ ԱԱՏՄ ղեկավար Հակոբ Ավագյանն այսօր կառավարության մամուլի կենտրոնում հրավիրված ասուլիսի ընթացքում ներկայացրեց իրենց կատարած աշխատանքի արդյունքները։
Նրա խոսքով՝ 98 կազմակերպություններում խախտումներ արձանագրելուց հետո դրանց գործունեությունը ժամանակավորապես դադարեցվել է։ Ստուգումների սկզբնական փուլում դա արվել է 6, ապա 24 ժամով։
Ուժեղացված հսկողություն է իրականացվել նաև սահմանային հսկիչ կետերում։ Այդ գործընթացը շատ ավելի վաղ է մեկնարկել՝ հունվարի 24-ին, 47 483 ուղևորների համար լրացվել են անհատական հասցեական քարտեր։
«Այնուհետև երբ հասցեական քարտերը փոխարինվել են ինքնամեկուսացման և մեկուսացման ծանուցագրերով, ծանուցվել են 23 311 ուղևորներ, որոնք գնացել են ինքնամեկուսացման, և Առողջապահության նախարարության, ինչպես նաև վերջին շրջանում արդեն հյուսիսային և հարավային մարզերի մարզպետարանների հետ համատեղ իրականացվել է 2509 ուղևորների մեկուսացում»,- տեղեկացրեց Ավագյանը։
Տեսչական մարմնի ղեկավարի խոսքով՝ մեկուսացման և ինքնամեկուսացման գործընթացին զուգահեռ եղել են նաև անմիջապես սահմանային կետերից հոսպիտալացվածներ։
«Ըստ մեր ընթացակարգի` եթե ժամանող ուղևորի մոտ առկա են լինում ցուցումներ, կամ հեռահար ջերմաչափի միջոցով տվյալներ են արձանագրում, որ ջերմում է կամ այլ ախտանիշներ են լինում, տեղի է ունենում հոսպիտալացում հենց մեր սահմանային հսկիչ կետերից։ Հոսպիտալացվածների թիվն այս պահի դրությամբ 217 է»,- նշեց Ավագյանը։
Նա նաև տեղեկացրեց, որ պարետի նոր որոշումից հետո, երբ հանվել են տնտեսական գործունեության մի շարք տեսակների նկատմամբ կիրառվող սահմանափակումները, և նրանց գործունեությունը թույլատրվել է անվտանգության և հիգիենայի սահմանված կանոնները խստորեն պահելու պայմանով, արդեն իսկ արձանագրվել են խախտումներ։ 8 տնտեսվարողների դեպքում կազմված տեղեկատվական փաթեթը ներկայացվել է պարետին, որպեսզի ժամանակավորապես դադարեցվի նրանց գործունեությունը։
ԱԱՏՄ ղեկավարի խոսքով՝ մինչև օրվա ավարտը նրանց թիվը կավելանա ևս երկու տասնյակով։
Հիշեցնենք` կորոնավիրուսի տարածումը կանխելու համար Հայաստանում արտակարգ դրության ռեժիմ է հայտարարված, որը կգործի մինչև 2020 թվականի մայիսի 14-ը՝ ժամը 17:00-ը ներառյալ։
Մայիսի 4-ից հանվել են քաղաքացիների տեղաշարժին ու տնտեսական գործունեությանը վերաբերող մի շարք սահմանափակումներ, այլևս չկա նաև տեղաշարժման թերթիկի անհրաժեշտություն։
