ԵՐԵՎԱՆ, 6 մայիսի– Sputnik. Հայ-ֆրանսիական առևտրաարդյունաբերական պալատն իր անհանգստությունն է հայտնել Ucom հեռահաղորդակցության օպերատորի և նրա տնօրենների խորհրդի նախագահի շուրջ կատարվող զարգացումների մասով։
«Ֆրանսիա-Հայաստան առևտրաարդյունաբերական պալատը Հայաստանում իր առաքելության շրջանակներում, որն է առևտրային, գործարարական և ներդրումային մթնոլորտի բարելավումն ու զարգացումը, ուշադրությամբ է հետևում «Յուքոմ» և «Գալաքսի» ընկերությունների խմբի շուրջ ծավալվող իրադարձություններին։ Այս կոնտեքստում առավել անհանգստացնող էր ՀՀ վարչապետի նորանշանակ խոսնակի ֆեյսբուքյան հայտարարությունը «Յուքոմ» ընկերության բաժնեմասերի օտարմանը կառավարության միջամտելու մտադրության և նույն ընկերության տնօրենների խորհրդի նախագահ Գուրգեն Խաչատրյանի շուրջ ծավալվող իրադարձությունների վերաբերյալ»,-ասված է հաղորդագրության մեջ:
Պալաատն ընդգծում է, որ Հայաստանի Հանրապետությունում պետական իշխանությունը իրականացվում է օրենսդիր, գործադիր և դատական իշխանությունների բաժանման ու հավասարակշռման սկզբունքի հիման վրա:
Եթե հաստատվի, որ Մինասյանը Ucom–ում բաժնեմաս ունի, այն կնվիրաբերվի «Իմ քայլին». պաշտպան
«Ցանկանում ենք հավատալ, որ խոսնակի հայտարարություններում առկա դատաիրավական և գործադիր մարմինների անառողջ փոխազդեցության հնարավորության ակնարկները զուտ խոսնակի անփորձության հետևանքն են»,–գրել են հայտարարության հեղինակները և հիշեցրել, որ իրավական պետության մեջ գործադիր իշխանությունը զերծ է մնում բաժնետերերի միջև ընթացող վեճերին միջամտելուց, դրանց վրա ազդելուց կամ ճնշումներ գործադրելուց։
Հիշեցնենք՝ ապրիլին լուրեր տարածվեցին, որ Ucom-ի շուրջ 800 աշխատակիցներ աշխատանքից դուրս գալու դիմում են գրել: Ապրիլի 14-ին ընկերության հիմնադիրներ և 5,94%-ի բաժնետերեր Եսայան եղբայրները հայտարարեցին, որ մյուս սեփականատերերին ավելի քան 34 մլրդ դրամ են առաջարկել մնացած բաժնետոմսերը ձեռք բերելու համար, որպեսզի կարողանան որոշիչ ձայն ունենալ բաժնետերերի որոշումներում:
Ապրիլի 15-ին, սակայն, հայտարարվեց, որ ընկերության տնօրենների խորհրդի նիստում ընկերության գլխավոր տնօրեն է նշանակվել Արա Սերգեյի Խաչատրյանը։
Խաչատրյանը եղել է «Գալաքսի ընկերությունների խմբի» գլխավոր ֆինանսական տնօրենը։
«Իմ առջև պահանջ է դրվել ոչ շահավետ առաջարկով օտարել Ucom-ը»․ Գուրգեն Խաչատրյան
Գուրգեն Խաչատրյանը, որը նախաձեռնել էր տնօրենների խորհրդի նիստը (Արա Խաչատրյանի ընտրության նպատակով), ՀՀ ՊԵԿ նախկին նախագահ, ֆինանսների նախկին նախարար Գագիկ Խաչատրյանի որդին է:
Դրանից հետո խուզարկություններ անցկացվեցին Գագիկ Խաչատրյանի որդիների տներում և գրասենյակներում։ Գուրգեն Խաչատրյանին կալանավորելու որոշում կայացվեց:
