ԵՐԵՎԱՆ, 6 մայիսի-Sputnik. Հասարակության մեջ տեղեկություններ են շրջանառվում, թե Հայաստանում կորոնավիրուսով հիվանդներ դեռ նախորդ տարեվերջին և այս տարեսկզբին են եղել, պարզապես այդ ժամանակ կորոնավիրուսի ախտորոշման թեստավորում չէր արվում, դրա համար էլ վիրուսը չի հայտնաբերվել։
ՀՀ առողջապահության նախարար Արսեն Թորոսյանին ևս հասել են շրջանառվող լուրերը։ Facebook սոցիալական ցանցի իր պաշտոնական էջում նախարարը տեղեկացրել է, որ հաշվի առնելով թեմայի կարևորությունը՝ հանձնարարել էր կորոնավիրուսային հետազոտություն իրականացնել լաբորատորիայում պահվող 26 նմուշներից, որոնք վերցվել էին սուր շնչառական վարակներ ունեցող քաղաքացիներից 2019թ. դեկտեմբեր և 2020թ. հունվար ամիսներին:
«Բոլոր 26 թեստի պատասխանները բացասական են: Հետևաբար մենք չունենք որևէ հիմք կարծելու, որ վարակը մեր երկրում շրջանառվել է ավելի վաղ, քան այն հայտնաբերվել է: Նման հիմքեր չկան նաև համաճարակաբանական առումով»,- գրել է նա։
ԱԺ–ում խստացրել են անվտանգության միջոցառումները. պատգամավորներից մեկի մոտ վարակի կասկած կա
Ինչ վերաբերում է փետրվարին, ապա Թորոսյանը հիշեցրել է՝ նոր կորոնավիրուսի թեստավորումը մեր երկրում սկսվել է փետրվարի 3-ից, և առաջին դրական պատասխանը ստացվել է միայն մարտի 1-ին:
Հիշեցնենք՝ այսօր առավոտվա տվյալներով՝ Հայաստանում կորոնավիրուսով վարակվածների թիվը վերջին մեկ օրում ավելացել է 163-ով և դարձել 2782։ Այս պահին փաստացի բուժում է ստանում 1600 մարդ, կատարվել է 26928 թեստավորում, արդեն առողջացել են վարակվածներից 1135–ը։ Ընդհանուր առմամբ, գրանցվել է կորոնավիրուսային հիվանդությունից մահանալու 40 դեպք և մահվան 7 անուղղակի դեպք։
