Բնապահպանության նախկին նախարար, «Հանուն կայուն մարդկային զարգացման» ասոցիացիայի նախագահ Կարինե Դանիելյանի կարծիքով` կառավարության բնապահպանական մղումներով քայլը թեև ողջունելի է, բայց հարց չի լուծում, որովհետև համայնքները շատ են տուժում հանքարդյունաբերության պատճառով։
«Ես մի քիչ այլ պատկերացում ունեմ հանքարդյունաբերության, հատկապես մետաղային հանքերի մասին, որովհետև առկա է մեծ վտանգ։ Մենք կատարել ենք հատուկ ուսումնասիրություններ ու եկել այն եզրակացության, որ հանքերն ուղղակի սպանում են մարզերը։ Այնպիսի վնաս, ինչիպիսին հասցվել է Լոռու և Սյունիքի մարզերին, տեղի բնակչության առողջությանը, ուղղակի աննկարագրելի է։ Կառավարության քայլը ենթադրենք մի փոքր կօգնի տեղի համայնքներին, բայց մենք նամակ էինք հղել գործադիր մարմնին` տարբեր մասնագետներից բաղկացած հատուկ հանձնաժողով ստեղծելու առաջարկությամբ, որը կուսումնասիրեր, թե ինչ կարելի է անել ահավոր վիճակից դուրս գալու համար, որ գոնե նոր մետաղային հանքեր չբացվեն»,– Sputnik Արմենիայի հետ զրույցում ասաց նա։
Դանիելյանի դիտարկմամբ` օրինակ՝ ոսկու հանքը խիստ բացասական ազդեցություն է գործում Սևանա լճի ջրերի վրա, կամ Երևանի շուրջ գործող 29 հանքերը թեև մետաղային չեն, սակայն դրանց փոշին գալիս է մայրաքաղաք, և կան փորձագիտական հետազոտություններ, ըստ որոնց` այդ փոշու մեջ կա առողջությունը վնասող տարրերի բարձր քանակություն։
Հանքահումքի միջազգային գների անկումը կարող է ուղղակիորեն հարվածել ՀՀ տնտեսությանը
«Հատկապես մետաղային հանքերի հետ կապված անհրաժեշտ է իրականացնել լուրջ ուսումնասիրություններ և գոնե բաց մետաղային հանքերի գործունեությունը դադարեցնել, որովհետև հանքերը մեզանում գործում են հակաէկոլոգիկան նորմերով։ Եթե խոսքը միայն մետաղային հանքերի մասին է, ապա նշեմ, որ արդեն ունենք թույներով լցված 23 պոչամբար, որոնք քաղցկեղի նման վտանգ են ներկայացնում և որոնց մետաստազները տարածվում են երկրի վրա»,– նշեց նախկին նախարարը։
Նա ափսոսանքով տեղեկացրեց, որ ՀՀ առողջապահության նախարարությունը չընդունեց իրենց ուսումնասիրությունները` նշելով, որ լուրջ խնդիր չկա, սակայն, նախկին նախարարի տեղեկացմամբ, իրենցից հետո չեխ մասնագետները, որոնք եվրասիական տարածաշրջանում ուսումնասիրում են ամենառիսկային գոտիները, հսկայածավալ միջազգային ծրագրի շրջանակում հետազոտել են Լոռու մարզը, և նրանց ստացած տվյալներն ավելի մտահոգիչ են, քան հայաստանյան մասնագետներինը։
Հայաստանի իշխանությունը կզբաղվի հանքերում թափոնների բաղադրության հարցով
Հիշեցնենք, որ ՀՀ կառավարությունը խորհրդարանի քննարկմանն է ներկայացրել մի օրինագիծ, որով առաջարկվում է մետաղական հանքերից ստացված բնապահպանական հարկերից բաժին հանել նաև այդ հանքի աշխատանքից տուժող համայնքներին:
