ԵՐԵՎԱՆ, 4 մայիսի — Sputnik. Տավուշի մարզի սահմանամերձ Բերքաբեր գյուղի ճանապարհները նորոգվում են։ Տեղեկությունը Facebook-ի իր էջում հայտնել է ՀՀ վարչապետ Նիկոլ Փաշինյանը` կից լուսանկար հրապարակելով։
Նա հիշեցրել է, որ սահմանամերձ այս համայնքի բնակիչները իրենց գյուղի ճանապարհի նորոգման հարցը բարձրացնում են արդեն առնվազն 25 տարի:
«Այս տարի բերքաբերցիները կունենան հիմնանորոգված ճանապարհ: Աշխատանքներն ընթանում են ամբողջ թափով»,–գրել է Փաշինյանը:
ՀՀ վարչապետը հավելել է, որ Երրորդ հանրապետության պատմության մեջ տեղի ունեցած բոլոր ընտրություններում իշխանությունները խոստացել են նորոգել ճանապարհը:
Հիշեցնենք, որ փետրվարի 7–ին կայացած ասուլիսի ընթացքում Տավուշի մարզպետ Հայկ Չոբանյանը հայտնել էր, որ մարզի ներհամայնքային ճանապարհներն այսուհետ իրենց կոլորիտով կտարբերվեն մյուսներից։ Դրանք ոչ թե ասֆալտապատ, այլ սալիկապատ կլինեն, որպեսզի նաև ավելի երկար ծառայեն։
Հաղարծինում երեխան ընկել է ձորը. օգնության են հասել փրկարարները
Նա հայտնել էր, որ 2019թ.–ին իրականացվել են 9 մլրդ դրամի ճանապարհաշինարարական ծրագրեր, հիմնանորոգվել 105 կիլոմետրից ավելի ճանապարհներ։ Վերանորոգվել են Տավուշով անցնող միջպետական ճանապարհները, Ներքին Կարմրաղբյուրի ճանապարհի շինարարությունն է ավարտվել։ Մարզպետի խոսքով` իրենց համար պատվի խնդիր էր Մովսես գյուղի ճանապարհը նորոգելը, և այն շուտով կավարտվի։
Հենց այդ ասուլիսի ընթացքում Չոբանյանը խոստացել էր, որ 2020–ին Բերքաբերի ճանապարհը կվերանորոգվի, ավարտին կհասցնեն Դիլիջան-Վանաձոր ճանապարհի վերանորոգման աշխատանքները։
