ԵՐԵՎԱՆ, 4 մայիսի - Sputnik. Երևանի Սարի թաղում մայիսի 1–ին քաղաքացուն հրազենային վնասվածք պատճառելու դեպքով ՀՀ քրեական օրենսգրքի 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասով և 258-րդ հոդվածի (խուլիգանություն) 4-րդ մասով հարուցվել է քրեական գործ, որը ստացվել է ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում և ընդունվել վարույթ: Տեղեկությունը հաղորդում է ՀՀ քննչական կոմիտեն։
Հայտնել էինք, որ մայիսի 1-ին, ժամը 13։00-ի սահմաններում, աջ ոտքի մասում հրազենային վնասվածքով Սարի Թաղի 28–րդ փողոցից «Էրեբունի» հիվանդանոց էր տեղափոխվել Արտաշես Ֆարսյանը։ Սկզբնաղբյուր կայքի տեղեկություններով` վիրավորը նախկինում եղել է դատապարտված, քրեական աշխարհում ունի ճանաչում և դատարանի որոշմամբ վերջերս է գրավով ազատ արձակվել։
Երևանում հոր և որդու վրա կրակոցներ արձակելու կասկածանքով 23-ամյա երիտասարդ է ձերբակալվել
Ըստ Քննչական կոմիտեի հաղորդագրության` առերևույթ հանցագործություն կատարած անձը ատրճանակից կրակոց է արձակել 32-ամյա տղամարդու ուղղությամբ՝ պատճառելով մարմնական վնասվածք, որից հետո դեպքի վայրից դիմել է փախուստի:
«Կատարվել են մի շարք քննչական գործողություններ, այդ թվում՝ դեպքի վայրի զննություն, որի ժամանակ հայտնաբերվել է 1 հատ կրակված պարկուճ և արնանման նյութի հետքեր, հարցաքննվել են վկաներ, կատարվել են առգրավումներ, լուսանկարով ճանաչման քննչական գործողություն, նշանակվել են դատաբժշկական և դատաձգաբանական փորձաքննություններ»,–ասվում է հաղորդագրության մեջ:
Վարույթն իրականացնող մարմինը որոշում է կայացրել վերը նշված անձին ձերբակալելու մասին, որի կատարումը հանձնարարվել է ՀՀ ոստիկանության համապատասխան ստորաբաժանմանը:
Նախաքննությունը շարունակվում է:
