ԵՐԵՎԱՆ, 4 մայիսի – Sputnik. ՀՀ ԱԺ առողջապահության և սոցիալական հարցերի մշտական հանձնաժողովի այսօրվա նիստին առողջապահության նախարար Արսեն Թորոսյանը տեղեկացրեց, որ կորոնավիրուսով վարակված անձանցից 35-ը ծայրահեղ ծանր վիճակում են։
«Կորոնավիրուսային հիվանդությամբ քաղաքացիների առողջական վիճակների մասով ունենք հետևյալ պատկերը. ծանր վիճակում` 65 հոգի, ծայրահեղ ծանր վիճակում` 35 հոգի, արհեստական շնչառության սարքին միացված` 9 հոգի»,– հայտնեց նախարարը։
Թորոսյանի խոսքով` մեկուսացման վայրերում են գտնվում մոտ 2000 քաղաքացիներ։ Մահճակալայի ֆոնդերի մասով նա տեղեկացրեց, որ հիվանդանոցներում կան մոտ 350 ազատ մահճակալներ։ Կորոնավիրուսով այն վարակվածները, որոնք չեն ունենա վիրուսին բնորոշ սիմպտոմներ, իրենց բուժումը կանցնեն հյուրանոցներում։
Հավելենք` Հայաստանում կորոնավիրուսով վարակվածների թիվը վերջին մեկ օրում ավելացել է 121-ով և դարձել 2507։
Այս պահին փաստացի բուժում է ստանում 1393 մարդ, ընդհանուր առմամբ կատարվել է 24942 թեստավորում, արդեն առողջացել են 1071–ը։ Գրանցվել է կորոնավիրուսային հիվանդությունից մահանալու 39 դեպք և մահվան 4 անուղղակի դեպք:
Աշխարհում կորոնավիրուսի գրանցված դեպքերը հատել են 3,5 միլիոնի սահմանը
Հիշեցնենք` կորոնավիրուսի տարածումը կանխելու համար Հայաստանում մարտի 16-ից ապրիլի 14–ն արտակարգ դրություն էր սահմանվել, որը ՀՀ փոխվարչապետ, պարետ Տիգրան Ավինյանն առաջարկեց երկարաձգել 30 օրով։
Կառավարությունն ապրիլի 13–ի արտահերթ նիստում ընդունեց համապատասխան որոշում, համաձայն որի ` արտակարգ դրության ռեժիմը Հայաստանում կգործի մինչև 2020 թվականի մայիսի 14-ը՝ ժամը 17:00-ը ներառյալ։
Ակնաբույժը նշել է կորոնավիրուսի ամենավաղ ախտանիշները
Մայիսի 1-ին հայտարարվեց, որ այսօրվանից` մայիսի 4-ից կհանվեն քաղաքացիների տեղաշարժին ու տնտեսական գործունեությանը վերաբերող մի շարք սահմանափակումներ, ինչպես նաև տեղաշարժման թերթիկի անհրաժեշտություն այլևս չի լինի։
