ԵՐԵՎԱՆ, 2 մայիսի – Sputnik. Ռուսական էստրադայի հայտնի երգչուհի Նադեժդա Բաբկինան դուրս է գրվել հիվանդանոցից և արդեն տանն է: Նա տեսաուղերձ է հղել իր երկրպագուներին։
«Սիրելիներս, ես այնքան ուրախ եմ, որ կարող եմ ձեզ հետ շփվել և շնորհակալություն հայտնել ուշադրության համար։ Այո, ես անցա փորձության միջով։ Ոչ ոքի չեմ ցանկանում անցնել դրա միջով, բայց ով գիտի, թե որտեղ է գտնվում այս վիրուսը և որտեղից կարող է ձեզ կպչել։ Պետք չէ ոչինչ պարզել, ընդամենը հետևեք այն կանոններին, որոնք սահմանված են մեզ համար։ Փորձությունը շատ բարդ է և ծանր, այն պետք է հաղթահարել», - ասել է երգչուհին։
Նա խոստովանել է, որ անընդհատ զգացել է իր երկրպագուների և մտերիմների աջակցությունն ու աղոթքները։
Посмотреть эту публикацию в Instagram
«Դուք ինձ ուժ ու եռանդ տվեցիք, որ դուրս գամ այդ սարսափելի իրավիճակից», — ընդգծել է Բաբկինան:
Երգչուհին հավելել է, որ հիմա վերականգնողական կուրս է անցնում։ Նա շնորհակալություն է հայտնել բժիշկներին, որոնք ամեն օր իր հետ են եղել։
Հիշեցնենք, մոտ մեկ ամիս առաջ երգչուհուն հիվանդանոց տեղափոխեցին կորոնավիրուսի կասկածանքով։ Նրա մոտ թոքաբորբ էր զարգացել, այնուհետև երգչուհուն միացրել էին թոքերի արհեստական շնչառության ապարատին։ Ավելի ուշ տեղեկություն տարածվեց, որ երգչուհին կոմայի մեջ է։ Ապրիլի 30-ին հայտնի դարձավ, որ նրա առողջական վիճակը լավացել է և մայիսի մեկին դուրս է գրվելու հիվանդանոցից։
