ԵՐԵՎԱՆ, 1 մայիսի – Sputnik. Շիրակի մարզի Մարալիկ և Ձորակապ բնակավայրերում այսօր` մայիսի 1-ին, լրացավ տեղաշարժի հատուկ ռեժիմի գործողության ժամկետը: Սահմանափակումները երկարացնելու անհրաժեշտություն չկա: Անի համայնքը վերադառնում է բնականոն կարանտինային փուլի:
Սահմանափակումների չեղարկման համար հիմք հանդիսացել է Հիվանդությունների վերահսկման և կանխարգելման ազգային կենտրոնի ուսումնասիրությունները:
«Իրավիճակը վերահսկելի ու կայուն է այս երկու բնակավայրերում: Համաճարակային օջախի զարգացումը իրենց համար այս պահին կառավարելի է, և այսօր արդեն տեղաշարժի սահմանափակումները դուրս են գալիս: Հանված են այս բնակավայրեր տանող անցակետերը»,- Sputnik Արմենիային ասաց Անի համայնքի ղեկավար Արտակ Գևորգյանը։
Նրա խոսքով` թեև սահմանափակումները հանված են, բայց չի նշանակում, որ կարանտինային փուլն էլ է հանված:
«Մինչ արտակարգ դրության ավարտը մեզ մոտ պահպանվելու են բոլոր նորմատիվները, մեր համայնքում` ավելի կանոնակարգված՝ հաշվի առնելով ռիսկերը։ Բնականաբար այս ընթացքում կշարունակվեն նաև կանխարգելիչ միջոցառումները»,-ասաց Գևորգյանը:
Հիշեցնենք՝ ՀՀ պարետի որոշմամբ՝ երկու բնակավայրերում ապրիլի 19-ից ապրիլի 25-ը սահմանվել էր տեղաշարժի հատուկ ռեժիմ, որը երկարացվեց մինչև ապրիլի 30-ը։ Պատճառն այն էր, որ Մարալիկի առողջության կենտրոնի աշխատակիցների մոտ կորոնավիրուս էր հայտնաբերվել: Անի համայնքում այս ընթացքում արձանագրվել է մահվան 3 դեպք:
Հավելենք, որ Գյումրու ինֆեկցիոն հիվանդանոցում այս պահին կորոնավիրուսով վարակված 68 մարդ է բուժվում, նրանցից 63-ը Շիրակի մարզի բնակիչ են։ Երևան տեղափոխված հիվանդների թիվը 18-ն է, ընդհանուր առմամբ առողջացել և հիվանդանոցից դուրս է գրվել 17 պացիենտ։ Մարզում առողջացած հիվանդների թիվն ավելացել է 4-ով, առողջացած պացիենտներից 3-ը Մարալիկի առողջության կենտրոնի աշխատակիցներ են։
Շիրակի մարզում այս պահին մեկուսացման և ինքնամեկուսացման ցուցում ունի 339 քաղաքացի։
Հայաստանում կորոնավիրուսի հետևանքով 27 տարեկան կին է մահացել
