Արթուր Նարինյանի փոխանցմամբ`կորոնավիրոսով պայմանավորված առկա իրավիճակում գրեթե բոլոր ոլորտների հիմնական աշխատողները բախվել են շատ լուրջ պրոբլեմի, ինչն Հայաստանում առաջացրել է նաև օրենսդրական խնդիր։
«Գործատուները հարկադիր պարապուրդի պատճառով չեն կարողանում վճարել աշխատողներին։ Աշխատանքային օրենսգիրքն էլ սահմանում է, որ ոչ գործատուի մեղքով պարապուրդը չի վճարվելու, իսկ աշխատողներն ուղղակիորեն կանգնել են խնդրի առաջ. չեն աշխատելու, չեն վճարվելու, հետևաբար եկամուտ չեն ունենալու»,– նշում է իրավաբանը։
Արթուր Նարինյանի դիտարկմամբ` թեև կառավարությունը կատարեց որոշակի քայլեր, սակայն խնդիրն, ըստ էության, մնաց չլուծված։ Ըստ նրա` այս պահին բոլոր ոլորտներում արդեն կան տոտալ կրճատումներ, ահազանգերը շատ են։ Ընդ որում` կրճատվում են ոչ միայն աշխատատեղերը, այլև աշխատաժամերն ու աշխատավարձերը, ինչը հետագայում բոլորին կանգնեցնելու է ավելի լուրջ խնդրի առջև։
«Շատ աշխատողների կրճատում են այն պատճառաբանությամբ, որ զգալիորեն նվազել են նաև գործատուների եկամուտները, բայցևայնպես նրանց իրավիճակի լուծման տարբերակներ չեն առաջարկում, հետևաբար աշխատավորները բախվում են անհաղթահարելի պատնեշի»,– ասում է իրավաբանը։
Արթուր Նարինյանի կարծիքով` կառավարության կողմից իրականացվող սոցիալական աջակցության ծրագրերն արդյունավետ են այնքանով, որ մարդիկ գոնե այս ժամանակահատվածում որոշակի միջոցներ են ստանում։ Բայց ՀՀ–ում կան շատ քաղաքացիներ, ովքեր օրավարձով աշխատողներ են, ուստի չեն կարող օգտվել այդ ծրագրերից։ Բացի դրանից, կան ոլորտներ, որոնք չեն գտնվում տվյալ ֆինանսավորման տիրույթում։
Կորոնավիրուսը հստակեցնում է աշխատողի ու գործատուի հարաբերությունները. նոր սահմանումներ
«Հայաստանում առհասարակ անձանց իրավագիտակցության հետ կապված խնդիր կա, որովհետև շատերը համակերպվում են ստեղծված իրավիճակի հետ, չեն արձագանքում խախտումներին ու հետամուտ չեն լինում իրենց իրավունքների պաշտպանությանը։ Մեր գրասենյակը ստեղծման օրից ի վեր արդեն ունեցել է ավելի քան 1000 դիմող։ Դատարանում է գտնվում 42 ընթացիկ գործ։ Մենք բնականաբար պաշտպանելու ենք մարդկանց իրավունքները և դատական ճանապարհով հասնելու ենք դրանց վերականգնմանը»,– փաստում է իրավաբանը։
Գործատուն կարող է չվճարել պարապուրդի համար. իսկ ի՞նչ կարող է պահանջել աշխատողը դրա դիմաց
Նրա տեղեկացմամբ` դատարանում քննվող գործերի մեծ մասն առնչվում է գործատուի կողմից աշխատողի ազատման հրամանը սխալ հիմքով տալուն, այսինքն` անօրինական կերպով աշխատանքից ազատելուն։
