ԵՐԵՎԱՆ, 30 ապրիլի — Sputnik. Երևանի գերեզմանատներից մեկի վարիչն ու հսկիչը գերեզմանատեղ հատկացնելու համար կաշառք են պահանջել։ Դեպքը հայտնաբերել ու այդ մասին հաղորդագրություն է տարածել Ազգային անվտանգության ծառայությունը։
«Երևանի «Բնակչության հատուկ սպասարկում» ՀՈԱԿ-ի գերեզմանատներից մեկի վարիչն ու նույն գերեզմանատան հսկիչը քաղաքացու կողմից նախընտրելի գերեզմանատանը գերեզմանատեղի հատկացնելու համար պահանջել են 719 280 դրամին համարժեք 1500 ԱՄՆ դոլար կաշառք»,–նշված է հաղորդագրության մեջ։
2020 թ. ապրիլի 29-ին գերեզմանատան հսկիչը նախապես պայմանավորված 1500 ԱՄՆ դոլար կաշառքը ստանալուց անմիջապես հետո բերման է ենթարկվել ՀՀ ԱԱԾ աշխատակիցների կողմից։ Անձնական խուզարկությամբ կաշառքի առարկան հայտնաբերվել և առգրավվել է, իսկ վերջինս խոստովանել է հանցագործության կատարումը։
ՊԵԿ–ի տեսուչներն «աչք փակելու համար» 30.000 դոլար կաշառք են պահանջել. ԱԱԾ–ի տեսանյութը
ՀՀ քրեական օրենսգրքի համապատասխան հոդվածներով առերևույթ հանցագործության դեպքի առթիվ ՀՀ ԱԱԾ քննչական դեպարտամենտում հարուցված քրեական գործով կաշառք ստացած պաշտոնատար անձինք ձերբակալվել են։
Նախաքննությունը շարունակվում է։
