ԵՐԵՎԱՆ, 29 ապրիլի – Sputnik. RT-ի և Sputnik-ի գլխավոր խմբագիր Մարգարիտա Սիմոնյանը սենսացիոն գրառում է հրապարակել իր ներկայացրած ընկերությունում հակամարմինների թեստի պատասխանների մասին։ Նա բոլորին խնդրել է ուշադիր կարդալ Telegram-գրառումը, որը գրվել է մեծագույն զգուշությամբ, «բազմաթիվ վերապահումներով»։
«Եվ այսպես։ Մենք Ռուսաստանում առաջինն ենք մեր աշխատակիցներին հակամարմինների զանգվածային թեստավորում անցկացրել (չհաշված զինվորականներին և բժիշկներին)։ Մենք հույս ունեինք, որ նման թեստավորումը մեզ թուլ կտա բացահայտել հիվանդացած և իմունիտետ ձեռք բերած մարդկանց։ Եվ հենց այդ մարդիկ էլ կաշխատեին, մինչ մենք կմեկուսացնեինք նրանց, ովքեր չեն հիվանդացել։ Արդյունքը մեզ ցնցեց։ 162 մարդկանցից ՈՉ ՄԵԿՆ իմունիտետ չունի։ Փոխարենը 16 հոգի հենց հիմա հիվանդ են կորոնավիրուսով։ Եվ նրանցից ոչ մեկն ախտանշաններ չունի։ Դա 10 տոկոսն է։ Մեկ անգամ էլ։ ՏԱՍԸ ՏՈԿՈՍԸ»,-գրել է Սիմոնյանը։
Պուտինը ոչ աշխատանքային օրերը երկարաձգել է մինչև մայիսի 11-ը
Նրա խոսքով`համաճարակի հենց սկզբից նախազգուշական միջոցներ են կիրառել։ Դեռ նախքան պաշտոնական մեկուսացումը մեդիաընկերությունը չեղարկել է բոլոր գործուղումները, նվազագույնի է հասցրել նկարահանումների քանակը, բոլոր նրանք, ովքեր կարիք չունեն ֆիզիկապես գտնվելու ստուդիաներում և տեխնիկական սենյակներում, ուղարկվել են հեռավար աշխատանքի։
Բացի այդ, աշխատակիցներին մշտապես թեստավորել են, մեկուսացրել են ոչ միայն նրանց, ում թեստը դրական արդյունք է ցույց տվել, այլև սեզոնային գրիպի ախտանիշներ ունեցողներին և բոլոր նրանց,ովքեր շփվել են նրանց հետ։ Քանի որ գրիպի և մրսածության նշաններ ունեցողներից յուրաքանչյուրը կարող էր COVID-19-ի կրող լինել։
«Եվ ահա մեզ մոտ ցուցանիշը 10 տոկոս է։ Ես սենսացիաներ ու հիստերիկաներ չեմ սիրում։ Բայց չեմ կարողանում չմտածել, որ այս իրավիճակը, ամենայն հավանականությամբ, միայն մեզ մոտ չէ։ Պարզապես մյուս ընկերությունները դեռ հակամարմինների այսքան զանգվածային թեստավորում չեն արել։ Խնդրում եմ, որ մասնագետները մեկնաբանեն մեր այս թվերը, բացատրեն, թե ինչ է սա նշանակում։ Եթե այսքան վարակված կա, և առողջացածներից ոչ մեկն իմունիտետ չունի, արդյո՞ք նշանակում է, որ մենք այս պահին սարսափելի լեռան ստորոտին ենք։ Եթե այսքան հիվանդացած կա և, փառք Աստծո, ոչ մի մահ, արդյո՞ք նշանակում է, որ կորոնավիրուսից մահացությունը շատ ավելի քիչ է, քան ընդունված է կարծել։ Խնդրում եմ, պատասխաններ տվեք մեզ։ Եվ ևս մեկ անգամ բոլորին խնդրում եմ՝ մնացե՛ք տանը»,-գրել է Սիմոնյանը։
Նշենք, որ վերջին մեկ օրվա ընթացքում Ռուսաստանում կորոնավիրուսային վարակի 5 841 դեպք է հաստատվել։ ՌԴ–ի 85 շրջաններում կորոնավիրուսով վարակվածների թիվը հասել է 99 399–ի։
Մեկ օրվա ընթացքում կորոնավիրուսից մահացել է 108 մարդ (մահվան դեպքերի ընդհանուր թիվը` 972), դուրս է գրվել 1830 առողջացած պացիենտ։ Համավարակի ընթացքում առողջացել է 10 286 մարդ։
Ըստ Ռոսբոտրեբնադզորի տվյալների՝ նոր տիպի կորոնավիրուսի ավելի քան 3,3 միլիոն լաբորատոր հետազոտություն է իրականացվել, 164,4 հազարը՝ վերջին 24 ժամում։ 199 834 մարդ գտնվում է բժշկական հսկողության տակ։
Դիվանագետները բախվում են անպատմելի իրավիճակների. Զախարովան` Հայաստանից չվերթի մասին
