ԵՐԵՎԱՆ, 29 ապրիլի – Sputnik. Գեղարքունիքի մարզի Գավառ քաղաքի հիվանդանոցում սարսափելի դեպք է տեղի ունեցել։ ArmLur.am-ի տեղեկություններով՝ մի խումբ անձինք երկաթյա ձողերով մտել են հիվանդանոց, ուր տեղափոխվել էին ժամեր առաջ Գավառում հնչած կրակոցների հետևանքով վիրավորվածները։
Գավառում տեղի ունեցած սպանությունների կադրերը հայտնվել են համացանցում
Այդ պահին հիվանդանոցում հսկողություն են իրականացրել ոչ միայն ոստիկանները, այլև այնտեղ է եղել անձամբ ոստիկանապետ Արման Սարգսյանը։
«Զինված անձինք ջարդուփշուր են արել հիվանդանոցի գույքը, որից հետո հրելով ճեղքել են ոստիկանների կազմած պատնեշը, մուտք գործել այն սենյակ, որտեղ պառկած են եղել վիրավորված երկու անձինք, և դանակով կտրել են նրանց երկուսի վիզը»,– գրում է կայքը` նշելով, որ դա վենդետա է եղել։
Ավելի վաղ տեղեկացրել էինք, որ Գեղարքունիքի մարզի Գավառ քաղաքում այսօր կրակոցներ են հնչել, 2 մարդ մահացել է, իսկ 4–ին տեղափոխել են հիվանդանոց։ Նախնական տեղեկություններով` կրակոցները հնչել են Գավառի համալսարանի մոտ։
Armlur-ի տեղեկություններով՝ կրակոցների պատճառը Նորատուս համայնքի և Գավառի անչափահաս տղաների միջև ծագած վեճն է եղել: Անչափահասների խնդիրը կարգավորելու, կողմերին հանդարտեցնելու նպատակով գործին խառնվել է զինվորական քննիչ Զորիկ Պարոնիկյանը, ինչից հետո էլ հնչել են կրակոցները: Shamshyan.com–ի տեղեկություններով` քննիչը սպանվածների թվում է։
Գավառի կրակոցների դեպքով 5 մարդ է ձերբակալվել. քննչական կոմիտեն մանրամասներ է հայտնում
Դեպքից հետո Գավառում և Նորատուսում իրավիճակը բավականին լարված է, և իրավապահները Երևանից խումբ են ուղարկել Գեղարքունիքի մարզ, որպեսզի կարողանան հանդարտեցնել երկու համայնքի բնակիչներին` հետագա արյունահեղությունը բացառելու համար, սակայն կրքերը դեռ չեն հանդարտվում:
Գավառի հիվանդանոցի վրա հարձակվողները 500-ից ավելի են եղել. կա տեսագրություն
