ԵՐԵՎԱՆ, 29 ապրիլի – Sputnik. Նոր պայմաններում կազմակերպությունները մեծ ջանքեր պետք է գործադրեն, որ կարողանան վերագտնել իրենց գործունեության բնականոն եղանակը: Կառավարության մամուլի կենտրոնում կայացած մամուլի ասուլիսի ժամանակ հայտնեց ՀՀ էկոնոմիկայի նախարար Տիգրան Խաչատրյանը։
«Դժվար է սպասել, որ կազմակերպությունները կարող են նախկինի պես գործունեություն ծավալել։ Ոչ, պետք է իրավիճակին հարմարեցված և նոր մարտահրավերներին դիմակայող վարքագիծ մշակվի: Կլինեն դժվարություններ։ Մենք մեր հերթին կփորձենք հասկանալ, թե կազմակերպությունները հատկապես որ հարցերում աջակցության կարիք ունեն»,–ասաց նախարարը։
Անդրադառնալով այս տարվա առաջին եռամսյակում Հայաստանի արտաքին ապրանքաշրջանառությունը` Խաչատրյանը նշեց, որ տնտեսական ակտիվությունը դրական է եղել։ Մասնավորապես, նախորդ տարվա առաջին եռամսյակի համեմատ` արտահանումը եղել է 0-ից քիչ բարձր, իսկ ներմուծումը` 6.2 տոկոսով պակաս:
Էկոնոմիկայի նախարարը նշեց, որ կորոնավիրուսի վատ ազդեցությունը մարտի վերջին երկու շաբաթվա վրա է միայն անդրադարձել:
Պետական բյուջեում փոփոխություն արվեց. կորոնավիրուսի վնասը գնահատվեց 300 միլիարդից ավելի
«Տարվա երկրորդ եռամսյակում կունենանք նվազ տնտեսական ցուցանիշներ, սակայն հույս ունենք, որ երրորդ եռամսյակից կսկի վերականգնվել այդ վիճակը»,–ասաց նախարարը։
Տիգրան Խաչատրյանը հայտնել է` ինչու են մերժվում տնտեսական աջակցության հայտերը
Հիշեցնենք, որ կորոնավիրուսի տարածման կանխարգելման նպատակով Հայաստանում արտակարգ դրություն է հայտարարվել մինչև մայիսի 14-ը։ Այս ընթացքում արգելվել է մի շարք տնտեսվարողների գործունեությունը. թույլատրվում էր միայն սննդի խանութների, գյուղմթերքի շուկաների և դեղատների գործունեությունը։ Երեկ ՀՀ վարչապետ Նիկոլ Փաշինյանը հայտարարել էր, որ առաջիկա 10 օրում պետք է բացվեն տնտեսական գործունեության բոլոր ոլորտները։
