ԵՐԵՎԱՆ, 29 ապրիլի — Sputnik. Մարտի 28-ին Գավառի Ազատության պողոտայում տեղի ունեցած հրաձգությունից հետո հիվանդանոց ներխուժած անձինք փորձել են հաշվեհարդար տեսնել այդ հրաձգության մասնակիցներից մեկի նկատմամբ: Գավառում լրագրողների հետ զրույցում այսպես մեկնաբանեց երեկվա դեպքը Գեղարքունիքի մարզպետ Գնել Սանոսյանը:
«Ես անձամբ, ոստիկանապետի հետ միասին, եղել եմ դեպքի վայրում, այսինքն՝ այնտեղ, որտեղ ժամեր առաջ եղել էին կրակոցները: Ոստիկանապետը հիվանդանոցում չի եղել: Հիվանդանոցում եղել են փոխմարզպետը, ոստիկանության տարբեր բարձրաստիճան պաշտոնյաներ» ,- ասաց Սանոսյանը:
Մարզպետը նշեց, որ հիվանդանոցի վրա հարձակվողները 500-ից ավելի են եղել, այդ իսկ պատճառով տեղում գտնվող ոստիկաններն ի զորու չեն եղել կանխելու տեղի ունեցած հանցագործությունը:
«Ականատեսների վկայությամբ` 500-ից ավելի են եղել, նաև տեսաձայնագրութունն է նման պատկեր տալիս: Իրավիճակը վերահսկողությունից դուրս է եկել, քանի որ տարբեր մուտքերից միաժամանակ ներխուժել են՝ դռներն ու պատուհանները կոտրելով»,- ասաց նա:
Սանոսյանի տեղեկություններով` հարձակման մասնակիցները եղել են Գավառ քաղաքի ու Նորատուս գյուղի բնակիչներ:
Ի դեպ, Սանոսյանը հայտնեց նաև, որ հիվանդանոցի վրա հարձակումը տեղի է ունեցել Գավառում կատարված փոխհրաձգությունից 1.5 ժամ հետո:
Հիշեցնենք` ապրիլի 28-ի երեկոյան Գավառում կրակոցներ են հնչել, որոնց հետևանքով երկու մարդ մահացել էր, իսկ 4–ը տեղափոխվել էին հիվանդանոց։
Այնուհետև գիշերը հայտնի դարձավ, որ որոշ մարդիկ մտել են Գավառի հիվանդանոց ու վիրավորներից երկուսի պարանոցը կտրել։ Նշվում էր նաև, որ տեղում է եղել ՀՀ ոստիկանապետ Արման Սարգսյանը։
Այսօր ոստիկանության լրատվության և հասարակայնության հետ կապերի վարչության պետ Աշոտ Ահարոնյանը հայտարարեց, որ ոստիկանապետը տեղում չի եղել, իսկ հիվանդանոցում որևէ մեկին չեն սպանել։
Ավելի ուշ Sputnik Արմենիային հայտնի դարձավ, որ Գավառում տեղի ունեցած ողբերգական դեպքի դրդապատճառները քրեական աշխարհի հետ առնչություն չունեն։
Դեպքից ամիսներ անց մեծահասակներն են որոշել հարցերը լուծել, և անչափահասներից մեկի կողմից Արմեն և Դավիթ Հայթյանները, իսկ մյուսի կողմից` Զորիկ Պարոնիկյանն ու Վահե Ավետիսյանը, հանդիպել են իրար։ Արդյունքում հնչել են կրակոցներ, որոնց ժամանակ Զորիկ Պարոնիկյանն ու Վահե Ավետիսյանը մահացել են, իսկ Արմեն և Դավիթ Հայթյանները դեպքի վայրից փախուստի դիմելիս ավտովթարի ենթարկվել ու տեղափոխվել հիվանդանոց։
Հենց նրանցից վրեժ լուծելու համար էլ հիվանդանոցի վրա հարձակվել է գազազած ամբոխը։
Հիշեցնենք նաև, որ եղբայրներն այժմ երևանյան հիվանդանոցներում են, նրանցից մեկին վիրահատել են։ Երկուսի վիճակն էլ ծանր է։
