ԵՐԵՎԱՆ, 28 ապրիլի — Sputnik. ՀՀ քննչական կոմիտեն տեղեկացնում է, որ ոսկու առքուվաճառքով զբաղվող «Վաղարշ և որդիներ» ՍՊ ընկերության փոխտնօրենն ընկերությանն առանձնապես խոշոր չափերի վնաս է պատճառել, ինչի առթիվ քրգործ է հարուցվել։
Նշենք, որ «Վաղարշ և որդիներ» ՍՊ ընկերության տնօրենը Վաղարշ Աբրահամյանն է, շատերին հայտնի «Ոսկու աշխարհի» տերը։
«Ոսկու առքուվաճառքով զբաղվող ՍՊ ընկերության տնօրենը, որը նաև «Վաղարշ և Որդիներ» ՍՊ ընկերության փոխտնօրենն է եղել, նշված ընկերության ոսկեգործական իրերի առևտրի կենտրոնում ունենալով վարձակալած տարածք՝ ոսկերիչներին ապահովել է ոսկով: 2011թ. հունիսի 29-ին ՍՊԸ–ի և բանկի միջև կնքվել է վարկային գծի պայմանագիր, ինչպես նաև նույն օրը նույն բանկի, ՍՊԸ և «Վաղարշ և որդիների» միջև կնքված երաշխավորության պայմանագրով՝ «Վաղարշ և որդիները» հանդիսացել է ՍՊ ընկերության չկատարած պարտավորությունների երաշխավորը»,–նշված է հաղորդագրության մեջ։
ՍՊ ընկերության տնօրենը, վստահությունը չարաշահելու եղանակով «Վաղարշ և որդիներ» ընկերությանն առանձնապես խոշոր չափերի գույքային վնաս պատճառելու դիտավորությամբ, 2012–ի հոկտեմբերի 26-ին ոսկու ստանդարտացված ձուլակտորների առքուվաճառքի պայմանագրով ձեռք է բերել 156.929.500 ՀՀ դրամ արժողության 7 ստանդարտացված ձուլակտոր։ Դրանցից 4-ը կնոջ միջոցով փոխանցել է «Վաղարշ և որդիներ» ընկերության տնօրինությանը: Այնուհետև նույն օրը՝ ժամը 16:34-ին, առանց կատարելու մյուս 3 ստանդարտացված ձուլակտորների՝ 67.255.500 ՀՀ դրամ գումարի վճարման պարտավորությունը, մեկնել է Հայաստանից։
Սպանել են «Ոսկու աշխարհ» առևտրի կենտրոնի պահակին
2012թ. նոյեմբերի 28-ին ՍՊ ընկերության տնօրենը ներգրավվել է որպես մեղադրյալ` ՀՀ քրեական օրենսգրքի 178-րդ հոդվածի (խարդախություն) 3-րդ մասի 1-ին կետով։ Նրա նկատմամբ որպես խափանման միջոց է ընտրվել կալանավորումը և հայտարարվել է հետախուզում:
2019թ. հունիսի 11-ին վերջինս ինքնակամ ներկայացել է վարույթն իրականացնող մարմին և տեղափոխվել «Արմավիր» ՔԿՀ: 2020թ. փետրվարի 27-ին առաջադրված մեղադրանքը փոփոխվել է, և նրան մեղադրանք է առաջադրվել ՀՀ քրեական օրենսգրքի 184-րդ հոդվածի (գույքային վնաս պատճառելը խաբեության կամ վստահությունը չարաշահելու եղանակով) 2-րդ մասի 1-ին կետով նախատեսված արարք առերևույթ կատարելու համար:
Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել է նախաքննության նկատմամբ հսկողություն իրականացնող դատախազին:
Հիշեցնենք, որ այս տարեսկզբին հայտնի դարձավ, որ Վաղարշ Աբրահամյանն ԱԱԾ քննչական վարչությանը հայտնել էր` իր ընկերությունը Երևանի Անտառային փողոցի թիվ 144/3 հասցեում ժամանակին իրականացրել է բազմաբնակարան շենքի կառուցում, այդ ժամանակ Երևանի քաղաքապետ Գագիկ Բեգլարյանի (Երևանի քաղաքապետ է եղել 2009-10թթ.) կողմից անհիմն կասեցվելու որոշում է կայացվել։ Աբրահամյանը շինղեկի՝ Արամ Վարդանյանի միջնորդությամբ կապ է հաստատել Գագիկ Բեգլարյանի եղբոր՝ Յուրա Բեգլարյանի հետ ու վերջինիս միջոցով մաս-մաս նրան են փոխանցել 75 հազար ԱՄՆ դոլար, որից հետո շինարարության վերսկսման հետ կապված խոչընդոտները վերացել են:
«Ոսկու աշխարհի» սպանության մանրամասները ներկայացնում է ոստիկանությունը. տեսանյութ
